Almaty oblysynda aiýdyń er adamǵa qalai shabýyldaǵany jaily politsiia qyzmeti baiandap berdi, dep habarlaidy "Ult aqparat".
«Kýágerlerdiń aitýy boiynsha, marqum Lepsi aýylynyń týmasy, týystaryna demalýǵa kelgen. 28 mamyr kúni ol úsh tanysymen birge atpen Lepsi ózenine balyq aýlaýǵa barǵan. Janynda iti bolǵan. 30 mamyr kúni úige qaitar tusta 6 shaqyrymdai jol júrgen. Jolda it aiýdyń qonjyqtaryn baiqap ony qýalaǵan. Iti borsyqtyń izine tústi dep oilaǵan atty jolaýshy sońynan ergen. Qalyń butanyń ishine kirgen it bir mezette qatty ulyǵan. Er adam itine kómektespek bolyp qalyń aǵashtyń ishine engen. Biraz ýaqyt ótkende onyń janushyrǵan daýysy estilgen. Sol sátte butanyń arasynan aiý atyp shyǵyp qasha jónelgen. Odan attar úrkip, adamdar seskenip qalǵan. Buta arasynan tabylǵan Resei azamaty aýyr jaraqattyń saldarynan kóz jumdy», - dedi Alakól aýdandyq politsiia bóliminiń bastyǵy Qýat Ospanov.
Politseiler kóktemde aiý qonjyǵyn qorǵaý úshin adamǵa shabýyl jasaýy múmkin ekenin jáne osyǵan bailanysty saq bolý qajettiligin eskertti.
«Aiý qonjyǵyn qorǵamaq bolǵanyna bailanysty, ol atylmaidy», - dep tolyqtyrdy oblystyq politsiianyń baspasóz qyzmetinen.
Esterińizge sala keteiik, Almaty oblysynda 41 jastaǵy Resei azamatyn aiý talap, mert bolǵan edi. Qaiǵyly oqiǵa 30 mamyrda saǵat 06.25-ter shamasynda Alakól aýdanynda taýda bolǵan. Atalǵan derek sotqa deiengi biryńǵai tergeý tizilimine oqys oqiǵa retinde tirkeldi.
