Aqtóbe oblystyq Politsiia departamentinde elimizdiń Ishki ister ministriniń orynbasary Arystanǵali Zapparovtyń qatysýymen QR Prezidenti Joldaýyn túsindirý máselelerine arnalǵan jiyn ótti, dep habarlaidy "Ult aqparat".
Polisia.kz portalynyń málimetinshe, jiynǵa departamenttiń bólim basshylary qatysyp, aýdandyq politsiia bólimderiniń basshylary selektor rejiminde qosylǵan.
Zapparov QR Prezidenti Qasym-Jomart Toqaevtyń Joldaýynyń politsiia jumysyna, onyń ishinde derbes Tótenshe jaǵdailar ministrligin qurý, ýchaskelik politsiia inspektorlarynyń mártebesin arttyrý, tsifrlandyrýdy damytý, jemqorlyqpen kúres syndy negizgi baǵyttary jaiynda sóz qozǵady.
«Prezident tapsyrmasyna sáikes, Tótenshe jaǵdailar ministrligi qaita quryldy. Burynyraq onyń qyzmeti Ishki ister ministrliginiń quramynda bolǵany belgili. Joldaýǵa sáikes, ýchaskelik politsiia inspektorlarynyń mártebesi arttyrylady. Bul - óte mańyzdy. Árbir ýchaskelik politsei óz aýdanynda abyroily, tanymal adam bolýy tiis. Biz ýchaskelik politsiia inspektorlarynyń materialdyq-tehnikalyq bazasyn jaqsartamyz, olardyń jalaqysyna qosymsha ústemaqy qarastyrylatyn bolady. Ýchaskelik politsiia inspektorynyń mártebesi, ókilettigi zańnamalyq negizde arttyrylady», - dedi ol.
Onyń aitýynsha, ýchaskelik politsiia inspektorlaryn jumys isteýi úshin kólikpen jáne planshetpen qamtý arqyly materialdyq-tehnikalyq bazasyn jaqsartý josparlanyp otyr. Buǵan qosa, búkil elimizdegi penitentsiarlyq mekemelerde, politseilerdiń qyzmettik bólmelerinde tutastai beinebaqylaý engizý sharalary qabyldanyp jatyr.
