Kórshi Reseiden zańsyz kólik ákelip, biraq elde tirkemegen 100-den astam qazaqstandyqqa izdeý salyndy. Bul týraly QR IIM Ákimshilik politsiia komiteti tóraǵasynyń orynbasary Serik Túsipov málim etti, dep habarlaidy QazAqparat.
«Qazaqstan aýmaǵynda tirkelmegen reseilik kólik ielerimen jumysty biz biyl tamyz aiynda bastaǵanbyz. Aldymen shekarada elge kirip jáne shyǵyp jatqan azamattar arasynda túsindirý jumysyn júrgizdik. Iaǵni, syrttan ákelingen kóliktiń zańǵa sai el aýmaǵynda mindetti túrde tirkeý kerektigin túsindirdik. Onyń barysynda elge Reseiden jalǵan qujat jáne tirkelmegen nómirmen ákelip jatqan avtokólikterdi anyqtai bastadyq. Ustalǵan avtomobilderdiń barlyǵy evakýatsiia jasalyp, aiyppul turaǵyna qoiyldy. Jáne árbir kúdikti kólik boiynsha Resei Federatsiiasynyń Ishki ister ministrligine arnaiy saýal joldadyq», - dedi Serik Túsipov ministrlikte ótken baspasóz máslihatynda.
Onyń aitýynsha, búginde atalǵan baǵyttaǵy jumys jalǵasyp jatyr.
«Resei Federatsiiasynyń Ishki ister ministrligi bizge ol jaqta satylyp, biraq Qazaqstanǵa kelgen soń tirkelmegen kólikterdiń tizimin jiberdi. Búginde sol tizim boiynsha elimizde 100-den astam kólik, iaǵni onyń iesi izdestirilip jatyr. Zańsyz ákelingen kólik ieleri tabylǵan jaǵdaida zań aiasynda jaýapqa tartylady», - deidi ol.
