Bul oqiǵa Oral qalasynda 2018 jyly 8 jeloqsan kúni bolǵan. Dostyq dańǵyly, 244-úi mekenjaiynda jigitter tóbelesip, mańaidyń mazasyn alǵan. Qyraǵy turǵyndar birden politsiia shaqyrady. Saqshylar kelgende buzaqylardyń bári úige kirip úlgergen bolatyn. Politsiia kapitany Muhit Abýlhairov pen leitenant Jandos Qubaevqa tóbelestiń aiaq astynan tyna qalǵany kúdikti kórigen. Bir kezde 9 qabattaǵy páterden áiel adamnyń janushyrǵan aiǵaiy estiledi. Kómek suraǵan daýysqa qarai júgiredi saqshylar. Olar 9-qabatqa shyqqanda bes jasar uldyń tamaǵyna pyshaq tirep alǵan er adamdy kóredi. Ógei áke balanyń anasyn aldyna osylai keltirmek bolǵan eken.
Artyq qimyl jasasa, ótkir pyshaq balanyń janyn qiiatynyn túsingen saqshylar ashýly jigitti jaimen áńgimege tarta bastaidy. Jigit sál bosańsyǵan sátte poltseilerdiń biri qolynan pyshaqty qaǵyp, ekinshisi balany qapsyra qushaqtaidy. Qas pen kózdiń arasynda bolǵan aiqasta bala da, ógei áke de jaraqat almaǵan.
1993 jylǵy jigittiń ishimdik ishkeni keiin anyqtaldy. Oǵan qarsy Qylmystyq kodekstiń 115-baby boiynsha is qozǵalyp, tergeý amaldary júrgizilýde. Al beikúná balanyń ómirin bir ajaldan alyp qalǵan qos saqshyny sábidiń týystary marapattaýdy suraǵan. Alaida, Muhit Abýlhairov pen Jandos Qubaevqa halyqtyń jyly sózi men shynaiy alǵysynan asqan biik mártebe joq.
Al astana kóshesinde kóligimen atoi salyp, beisaýat eldiń ómirine qaýip tóndirgen «asaý júrgizýshini» Nur-Sultan qalasynyń politsiia departamentine qarasty jol-patrýldik politsiia polkiniń inspektory Jandos Ózbek pen politsiia aǵa serjanty Rýslan Shmidt sabasyna túsirgen bolatyn.
Rýslan men Jandos qala kóshelerin patrýldeý kezinde eshkimge des bermegen esersoq júrgizýshige «quryq saldy». 21 qarasha kúni belgisiz júrgizýshi kólik apatyn jasap, oqiǵa ornynan izin jasyryp úrgeredi. Erteńinde qala kóshelerindegi kameranyń birine kúdik kólik túsip qalady.
«Bárimiz kúdikti kóliktiń sońyna tústik. Júrgizýshi Kenesary kóshesimen kele jatyp, Sembinov kóshesine kilt buryldy. Abai men Sembinov kósheleriniń qiylysyna kelgende baǵdarshamnyń qyzyl túsi jandy da, kúdikti uzai berdi. Sonda da qol qýsyryp otyrmai, daýys ulǵaitqyshpen joldyń oń jaǵyna qarai toqtaýyn buiyrdyq. Alǵashynda ońǵa qarai yǵysqandai boldy da, alystai berdi. Sembinov kóshesinen solǵa burylǵan tusta biz de sońynan jetken bolatynbyz. Daýys ulǵaitqyshpen úsh ret aitqanda baǵynbasa, zańdy talap oryndalmaǵan bolyp esepteledi. Biz sol kezde basqa avtopatrýlderge ratsiia arqyly habarladyq», - dep eske alady Jandos Ózbek.
Kólik júrgizýshisi qolǵa túspeý úshin avtobýsty búiirimen janap ótip, jolda synyp turǵan kóliktiń syrtynan ainalyp ótedi. Al Seifýllin-Asan qaiǵy kósheleri qiylysynda jaiaý júrginshini qaǵyp kete jazdaidy. Jan-jaqtan qyspaqqa túsken tizginshi Abai kóshesine qaita túsedi. Osy sátti paidalanǵan politsiia qyzmetkerleri kóshedegi barlyq baǵdarshamdy qyzylǵa aýystyra qoiady. Qalyń keptelistiń ortasynda qalǵan «asaý júrgizýshi» sonda ǵana damyldaidy. Rýslan men Jandos osy kezde uiymdasyp áreket etedi. Júrgizýshi olr kelgende esiktiń bárin ishten qulyptap alǵan bolatyn.
«Ol qarsylyq tanytyp, esigin ashpai qoidy. Men oń jaq esiktiń terezesin kisenmen syndyrdym. Qolymdy salyp esiktiń tutqasyn tartyp ashtym. Osy tusta seriktesim shiraq qimyldap, 2 sekýndta júrgizýshini syrtqa alyp shyqty. Qoian-qoltyq kúrestiń ádis-tásilderin qoldanyp, qolyna kisen saldyq. Onyń ústinen birneshe bap boiynsha ákimshilik hattama toltyryldy. Ózinde júrgizýshi kýáligi men saqtandyrý poliýsi de joq eken», - dedi Rýslan Shmidt.
Jandostyń politsiia qatarynda qyzmet etip júrgenine 3 jyl. Ol Jambyl oblysy, Shý aýdany, Qonaev aýylynyń týmasy. Qaraǵandy respýblikalyq áskeri mektep-internatyn bitirgen. Ony támamdai sala áskeri boryshyn óteýge attanǵan. Seriktesi Rýslan Shmidt ekeýi zamandas. Onyń da tártip pen tynyshtyq kúzetinde júrgenine 5 jyldai bolǵan. Týyp ósken jeri - Almaty oblysy, Ile aýdany, Aqshi aýyly. Ol Almatydaǵy kolledjderdiń birinde bilim alyp, Otan aldyndaǵy áskeri boryshyn ótegen. 2013 jyly áskerden oralyp, osy salaǵa bet burǵan. Olar búginde quqyq qorǵaý organdary qyzmetiniń qyr-syryna qanyqqan bilikti mamanǵa ainalyp keledi.
