Qazaqstandyq meditsina qyzmetkerleri virýsty pnevmoniia juqtyrǵan jaǵdaida áleýmettik ótemaqy alady, dep habarlaidy "Ult aqparat".
Osy másele «Densaýlyq saqtaý uiymdarynyń COVID-19 koronavirýstyq infektsiiasyna qarsy kúres jónindegi epidemiiaǵa qarsy is-sharalarǵa tartylǵan qyzmetkerleri atalǵan infektsiiany juqtyrǵan nemese odan qaitys bolǵan jaǵdaida olarǵa birjolǵy áleýmettik tólemdi júzege asyrý qaǵidalaryn bekitý týraly» Eńbek jáne halyqty áleýmettik qorǵaý ministriniń 2020 jylǵy 9 sáýirdegi № 129 jáne Qazaqstan Respýblikasy Densaýlyq saqtaý ministriniń 2020 jylǵy 9 sáýirdegi № QR DSM-35/2020 birlesken buiryǵyna engizilgen ózgeristerde aitylǵan.
Ereje COVID-19 – koronavirýs infektsiiasyna qarsy kúres boiynsha epidemiiaǵa qarsy sharalarǵa jumyldyrylǵan densaýlyq saqtaý uiymdarynyń qyzmetkerleri eger olar klinikalyq jáne epidemiologiialyq belgileri bar, COVID-19 - koronavirýs infektsiiasy belgilerine uqsas infektsiiany juqtyrǵan jáne sodan qaitys bolǵan jaǵdaida biryńǵai áleýmettik tólem júrgizýdi kózdeidi.
«Biryńǵai áleýmettik tólem Memlekettik áleýmettik saqtandyrý qory esebinen júrgiziledi. Atap aitqanda - COVID-19 – koronavirýs infektsiiasyn juqtyrǵan, virýsty pnevmoniiamen aýyrǵan jaǵdaida – 2 million teńge beriledi. Al COVID-19 – koronavirýs infektsiiasynan nemese virýsty pnevmoniiadan qaitys bolǵan jaǵdaida otbasyna 10 million teńge beriledi», - delingen qujatta.
Tólem COVID-19 koronavirýs infektsiiasy, virýsty pnevmoniiamen juqtyrý faktisi anyqtalǵan kúnnen bastap eki jumys kúni ishinde densaýlyq saqtaý uiymdarynyń basshylarynyń jazbasha túrde bergen aqparattarynyń negizinde júzege asyrylady. Osylaisha meditsinalyq qyzmetkerlerdiń tizimi jasalady.
Ózgertilgen buiryqtyń tolyq nusqasyn myna siltemeden kórýge bolady.
