Qazaqstandaǵy ýniversitetterdiń bárinde plagiatty tekseretin júieler ornatyldy. Bul týraly QR Bilim jáne ǵylym ministri Ashat Aimaǵambetov Úkimet otyrysynda aitty, dep habarlaidy QazAqparat.
«Bilim berý baǵdarlamalarynyń sapasyn arttyrý úshin ýniversitetterge akademiialyq jáne atqarýshy derbestik berdik. Osyǵan orai, olar bilim berý baǵdarlamalaryn daiyndaǵanda ministrlik bekitken úlgilik oqý josparlarynyń ornyna jumys berýshilerdiń kásiptik standarttaryn negizge alatyn boldy. Tiisinshe joǵary oqý oryndary bilim berý baǵdarlamalaryn óz betinshe ázirleýge kóship, 9 371 baǵdarlama ázirlendi», - dedi Ashat Aimaǵambetov.
Ministr tórtinshi indýstriialyq revoliýtsiianyń áserinen álemdik eńbek naryǵynda «daǵdylardyń tez eskirýi» qalypty jaǵdaiǵa ainalǵanyn eske saldy.
«Ómir boiy bir diplom» stsenarii endi mańyzdy emes. Sondyqtan Prezidenttiń tapsyrmasy boiynsha Ómir boiy oqý tujyrymdamasy ázirlendi. Bul jumystyń arqasynda ýniversitetter formaldy emes jáne informaldy bilim alýdyń nátijelerin tanyp, qabyldaityn bolady», - dedi vedomstvo basshysy.
Onyń málimeti boiynsha, eldegi joǵary oqý oryndaryna akademiialyq adaldyq talaptaryn saqtaý mindeti júktelip otyr. Vedomstvo plagiat problemasymen osylaisha kúrespekshi.
«Endi akademiialyq adaldyq qaǵidattaryn buzǵan stýdentterdi oqýdan shyǵarýǵa múmkindik bar. Barlyq diplomdyq jumystardy, jazbasha jumystardy jónsiz kóshirip alýdy bolǵyzbaý úshin mindetti túrde tekserý normasy engizildi jáne ýniversitterdiń bárinde osy tekserý júieleri ornatyldy», - dedi ministr.
