Foto: Ashyq derekkóz
Ramazan aiynda beriletin pitir sadaqany ýaqytynda bere almaǵandar ne isteý kerek jáne bul sadaqanyń mólsheri qalai bekitiledi. Pitir sadaqaǵa qatyty el kókeiindegi suraqtardyń jaýabyn muftyat.kz jariialady.
Basylymnyń jazýynsha, pitir sadaqasy qajettiligin qospaǵanda, mal-múlki nisab (shariǵat bekitken bailyqtyń zeket berýge jetken eń az mólsheri) mólsherine jetken árbir musylmannyń berýi ýájip. Ol orazanyń qate-kemshilikterin toltyratyn, Qudaiǵa shúkirshilik etý úshin beriletin jáne kedeilerdi qýantatyn sadaqa.
Ibn Omardan jetken hadiste bylai deidi:
"Allanyń Elshisi Ramazan aiynda pitir sadaqasyn ár bir azat musylmanǵa, er men áielge, úlken men kishige bir saǵ qurma nemese arpadan berýdi mindettedi. Ári ony adamdar ait namazyna shyqpas buryn óteýdi ámir etti".
Ibn Abbastan (r.a.) jetken hadiste:
"Allanyń Elshisi (oǵan Allanyń salaýaty men sálemi bolsyn) pitir sadaqasyn berýdi ramazan aiyndaǵy oraza kezinde jiberilgen qatelikterdi tazartý úshin ári miskinderge bir toi bolý úshin mindet etken", - delingen.
Turmysy nashar, iaǵni artyq mal-múlki nisab mólsherine jetpegen kisi pitir sadaqa berýge mindetti emes, saýap úshin berip jatsa óz erki. Qaitys bolǵan adamdarǵa, ana qursaǵyndaǵy balaǵa pitir sadaqa berilmeidi.
Pitir sadaqanyń mólsheri bidai nemese un jáne meiizden jarty saǵ (2 kg), al arpa men qurmadan bir saǵ (4 kg), iaki osylardyń aqshalai quny beriledi.
2025 jylǵy pitir sadaqanyń baǵasy naryqtyq ortasha baǵasymen eseptelip tómendegidei bekitildi:
Bidai 2 kg – 376 teńge.
Un 2 kg – 655 teńge.
Arpa 4 kg – 569 teńge.
Meiiz 2 kg – 5626 teńge.
Qurma 4 kg – 10 523 teńge.
Qazirgi tańda bidaidyń ózi emes, un, talqan sekildi onyń ónimderi keń qoldanylady. Sol sebepti Qazaqstan musylmandary dini basqarmasy pitir sadaqanyń qunyn unmen esepteýdi negizge alady. Óitkeni shariǵatta bidaimen qatar onyń ónimderimen de pitir sadaqa berýge ruqsat etiledi.
Pitir sadaqany berýdiń ýájip ýaqyty aittyń birinshi kúni. Ony Ramazan aiynyń birinshi kúninen bastap berýge bolady. Ýaqytynda bere almaǵan jaǵdaida ait namazynan keiin berse de bolady. Alaida pitirdi ait namazyna deiin berý – mustahab.
Eske salsaq, Qazaqstannyń bas múftii Naýryzbai qajy Taǵanuly orazada beriletin pitir sadaqaǵa qatysty pikir bildirgen.
