Petropavlda kópqabatty úidiń mańynda itti soiǵandardyń kim ekeni anyqtalyp, tergeý amaldary bastaldy, dep habarlaidy "Ult aqparat".
Buǵan deiin Petropavlda belgisiz bireýlerdiń kópqabatty úidiń mańynda itti soiǵanyn aitqan edik. Beinejazba áleýmettik jelide tarady.
Soltústik Qazaqstan oblysy politsiia departamenti baspasóz qyzmetiniń málimetinshe, osy derekke qatysty Petropavlda QR QK 316-baby «Janýarlarǵa qatigezdik jasaý» boiynsha sotqa deiingi tergeý bastaldy. Qazirgi ýaqytta Birinshi politsiia bóliminiń qyzmetkerleri sotqa deiingi tergeý aiasynda jumys istep jatyr.
Itti soiǵandar 42 jastaǵy er adam men 60 jastaǵy áiel. Jedel ýákilder olardy anyqtap, ustady.
Petropavldaǵy «Faýna» qoǵamdyq birlestigi ókilderi de bul oqiǵa jaiynda pikir bildirdi.
«Búgin barlyǵy jantúrshigerlik beinajazbany kórdi... Bul ońbaǵandardy jazalap, qylmystyq jaýapqa tartý úshin barynsha kúsh salǵan boijetkenge alǵys aitamyz. Qazir men de baryp, «Faýna» QB volonterleri atynan aryz jazamyn. Mundai aryzdardyń kóp bolǵany durys, sonda olar jazadan qutylyp ketpeidi.
2020 jyly bul áiel bizge de kelip it suraǵan edi. Olardan buǵan deiin de qanshama janýar zardap shegýi múmkin», - deidi volonter.
