Petropavlda 22 jastaǵy jigit esirtki saqtap, taratqan degen kúdikpen qamaýǵa alyndy, dep habarlaidy QazAqparat.
Soltústik Qazaqstan oblysy Politsiia departamenti baspasóz qyzmetiniń málimetinshe, Petropavldyń 22 jastaǵy turǵyny tamyz aiynyń sońynda esirtki qylmysymen kúresýshilerdiń nazaryna iligedi. Tártip saqshylaryna onyń esirtki taratýǵa qatysy bolýy múmkin degen aqparat túsken. Jedel-izdestirý is-sharasy nátijesinde kúdikti ustaldy. Onyń turǵylyqty jerinen túiinshikterge bólip salynǵan jalpy salmaǵy 31 gramm untaq zat tabyldy.
Saraptama tárkilengen zattyń sintetikalyq psihobelsendi zat – «mefedron» ekendigin kórsetti. Bul kokainnyń sintetikalyq analogy. Ol 500-ge jýyq túiinshekke bólip salynǵan.
«Tergeý amaldaryn júrgizý kezinde onyń esirtki tabletkalaryn jasyryn jerlerge salǵany anyqtaldy. Metamfetamin, kóbine «ekstazi» ataýymen tanymal psihotropty zat. Biyldyqqa ol birinshi ret oblys aýmaǵynda anyqtalyp otyr. Asa iri mólsherdegi esirtki zattarymen zańsyz ainalysý faktisi QR Qylmystyq kodeksiniń 297-baby 3-bóligi «Esirtki, psihotroptyq zattardy, sol tektesterdi ótkizý maqsatynda zańsyz daiyndaý, qaita óńdeý, iemdený, saqtaý, tasymaldaý, jóneltý ne ótkizý» boiynsha Sotqa deiingi tergep-tekserýlerdiń biryńǵai tizilimine engizildi. Kúdikti qamaýǵa alyndy», - deidi SQO PD esirtki qylmysyna qarsy is-qimyl basqarmasy bastyǵynyń mindetin atqarýshy Ivan Terzidi.
Qylmystyń bul túrine on jyldan on bes jylǵa deiingi merzimge bas bostandyǵynan aiyrý jazasy qarastyrylǵan.
