20 qyrkúiekte 18 jastaǵy stýdent atys shyǵarǵan Perm memlekettik ýniversitetinde 22 qazaqstandyq stýdent oqidy. Olardyń eshqaisy oqiǵa kezinde zardap shekken joq, - dep habarlaidy "Ult aqparat" Syrtqy ister ministrligi baspasóz qyzmetine silteme jasap.
"Qazan qalasyndaǵy QR Bas konsýldyǵynyń konsýldyq aimaǵy boiynsha qazaqstandyq stýdentterdiń jalpy sany - shamamen 5 myń adam. Al Perm memlekettik ulttyq zertteý ýniversitetinde 22 qazaqstandyq stýdent oqidy. Ýniversitette bolǵan qaiǵyly oqiǵa saldarynan qaza tapqandar men zardap shekkenderdiń arasynda Qazaqstan Respýblikasynyń azamattary joq , - dedi SIM baspasóz qyzmetiniń ókili.
Vedomstvo málimetinshe, qazaqstandyq stýdentterdiń eshqaisy elshilikke júginbegen.
Qazaqstannyń Qazandaǵy Bas konsýldyǵynyń konsýldyq aýdany: Bashqurtstan Respýblikasy, Marii-El Respýblikasy, Mordoviia Respýblikasy, Tatarstan Respýblikasy, Ýdmýrtiia Respýblikasy, Chývashiia Respýblikasy, Kirov, Nijnii Novgorod, Penza, Sverdlovsk, Ýlianov oblysy Resei Federatsiiasy, sondai-aq Perm ólkesi.
