2023 jyldan bastap tolyq jinaqtalǵan aýyl mektepterin jan basyna qarjylandyrýǵa birtindep kóshirý josparlanyp otyr. Bul týraly Úkimet otyrysynda «BILIMDI ŪLT» barshaǵa arnalǵan sapaly bilim» ulttyq jobasyn tanystyrý kezinde Bilim jáne ǵylym ministri Ashat Aimaǵambetov málim etti, dep habarlaidy QazAqparat.
«Orta bilim berý júiesiniń sapasyn arttyrýǵa toqtalsaq, Ulttyq joba aiasynda bir jaǵynan qala men aýyl jáne óńirler arasyndaǵy bilim sapasyndaǵy alshaqtyqty azaitý, ekinshi jaǵynan jalpy respýblikanyń bilim sapasyn arttyrý úshin keshendi sharalar qarastyrylady. Memleket basshysynyń tapsyrmasy boiynsha pedagogtardyń jalaqysyn ári qarai ósirý máselesi qamtyldy. Oqýlyqtardy ázirleý jáne olarǵa saraptama júrgizýge jańa tásilder ázirlenedi, pedagogtardyń kásibi damytý júiesi jetildiriletin bolady», - dedi A. Aimaǵambetov.
Onyń aitýynsha, pandemiiaǵa jáne aldyńǵy oqý jylyndaǵy qashyqtan oqytýǵa bailanysty «Tsifrlyq ustaz» jobasyn iske asyrý Ulttyq jobaǵa engizildi.
«Qazirgi ýaqytta bilim salasyndaǵy tárbie jumysynyń mańyzdylyǵyn eskere otyryp, «Qundylyqtarǵa negizdelgen bilim berý» tárbie jobasyn iske asyrý, mektep pen ata-ananyń ózara qarym-qatynasy júiesin jetildirý, ózin-ózi basqarý, debat qozǵalystaryn odan ári damytý siiaqty jobalar da qarastyryldy. Buǵan qosa 2023 jyldan bastap tolyq jinaqtalǵan aýyl mektepterin jan basyna qarjylandyrýǵa birtindep kóshirý josparlanýda. Bul da qala men aýyl mektepteri arasyndaǵy sapa alshaqtyǵyn sheshýge múmkindik beredi», - dedi ministr.
