Foto, video: «QazAvtoJol» AQ
Ertis aýdanynyń Uzynsý aýylyna qarǵyn sý qaýip tóndirýine bailanysty mamandar osyndai sheshim qabyldaǵan. Qazir Atameken-Ertis-Rýsskaia Poliana avtojolynyń 194-236 km aralyǵynda kóliktiń barlyq túrine shekteý qoiyldy, dep habarlaidy «Ult aqparat» «QazAvtoJol» AQ kompaniiasynyń baspasóz qyzmetine silteme jasap.
3 sáýir kúni saǵat 06.00 shamasynda Pavlodar oblysy Ertis aýdany Uzynsý aýylyna sý tasqyny qaýpi tónýine bailanysty jergilikti atqarýshy organnyń sheshimimen respýblikalyq mańyzy bar «Atameken-Ertis-Rýsskaia poliana» avtojolynyń 207 shaqyrymyn buzý jumystary atqaryldy. Erigen qar sýy qazir sol arqyly aǵyp ketip jatyr.Panfilov aýylynan RF shekarasyna deiingi 194-263 shaqyrym aralyǵynda kólik quralynyń barlyq túriniń qozǵalysyna shekteý qoiyldy. Qaýipsiz jol qozǵalysyn qamtamasyz etý maqsatynda táýlik boiy baqylaý ornatyldy. Atalǵan ýchaskede 9 tehnika jumys istep jatyr», - dep málimdedi kompaniiadan.
Óńirlik tótenshe jaǵdailar departamenti oblys boiynsha 7 avtojol ýchaskesi baqylaýda turǵanyn málimdedi. Qardyń erýi jáne nóser jańbyrdyń saldarynan qazirgi ýaqytta Aqtoǵai, Sharbaqty jáne Ertis aýdandarynda jalpy sany 18 turǵyn úi sý astynda qaldy.
Aqtoǵai aýdany Sholaqsor aýylynda sý deńgeiine monitoring jalǵasyp jatyr. Sý tasqynyna qarsy is-sharalar Jalaýly aýylynda da júrgizilýde. Keshe 1 200 qapshyq tóselip, 275 tonna inertti material tógilgen. 90 myń tekshe metr sý soryldy.
Qazirgi tańda soltústik aýmaqtaǵy aýdandar erekshe baqylaýda tur. Jelezin men Tereńkól aýdandarynda eldi mekenderden erigen qar sýyn burý boiynsha jumystar júrgizilip jatyr.
Oblys boiynsha sý tasqynyna qarsy is-sharalarǵa barlyǵy 350 adam, 137 birlik tehnika, 39 motopompa, 2 júzý quraly jumyldyrylylǵan.
Eske sala keteiik, pavlodarlyq qutqarýshylar Sholaqsor aýylyn topan sýdan aman alyp qaldy. Oblysta sý tasqynyna bailanysty bir aýylda tótenshe jaǵdai jariialandy.
