Foto: Polisia.kz
Pavlodarda zeinetker áiel alaiaqtardyń quryǵyna túsip, 2 million teńgeden astam jinaǵynan aiyryla jazdady, alaida bank qyzmetkeri men politsiianyń qyraǵylyǵynyń arqasynda qarajatyn aman alyp qaldy, dep habarlaidy Ult.kz.
Polisia.kz saitynyń málimetinshe, belgisiz er adam zeinetkerdiń úi telefonyna habarlasyp, ózin Ulttyq bank qyzmetkeri retinde tanystyryp, qujattardy shuǵyl qaita rásimdeý qajettigin aityp sendirgen. Suhbat barysynda ol keiýananyń esepshotyndaǵy qarajat kólemin anyqtap, aldaý jolymen aldymen 1 million 300 myń teńgeni aýdartqan. Alaiaqtar psihologiialyq qysym kórsetý maqsatynda zeinetkerdi WhatsApp messendjeri arqyly táýlik boiy baqylaýda ustap, oǵan týystarymen nemese bógde adamdarmen sóilesýge qatań tyiym salǵan. Tipti, ony bankke jetkizý úshin arnaiy kólik jiberip, jol boiy júrgizýshimen tildespeýdi nusqaǵan.
Qalǵan somany aýdarý úshin bank bólimshesine kelgen áieldiń mazasyz minez-qulqyn baiqaǵan bank qyzmetkeri birden kúdiktenip, politsiiaǵa habar bergen. Oqiǵa ornyna jedel jetken tártip saqshylary qosymsha zańsyz tranzaktsiianyń aldyn alyp qana qoimai, zeinetkerge buryn aýdarylǵan qomaqty qarjyny qaitarýǵa da kómektesti. Osylaisha, qart kisilerdiń kóp jylǵy jinaǵy tolyqtai saqtalyp qaldy. Óz kezeginde zeinetker men onyń jubaiy politsiia qyzmetkerleriniń kásibi sheberligi men jedel áreketine sheksiz alǵystaryn bildirdi.
