© Photo : Pixabay / lukasbieri
Pavlodarda er adam VKontakte áleýmettik jelisinde burynǵy jubaiymen jeke sipattaǵy fotosýretter men beinematerialdar jariialaǵan, dep habarlaidy "Ult aqparat" Pavlodarnews.kz-ke silteme jasap.
Oblystyq politsiia departamenti baspasóz qyzmetiniń málimetinshe, qala turǵynyna qatysty áleýmettik jelilerde basqa adamnyń jeke ómiri týraly málimetterdi onyń kelisiminsiz taratqany úshin sotqa deiingi tergep-tekserý bastaldy.
«Sondai-aq ózin burynǵy jubaiynyń qurbysy retinde tanystyrǵan er adam ol týraly jalǵan aqparat taratyp, hat jazysqan. Bul týraly estigen qala turǵyny politsiiaǵa júgindi. Qazirgi ýaqytta atalǵan fakti boiynsha Qazaqstan Respýblikasy QK 147-babynyń 5-bólimi boiynsha sotqa deiingi is júrgizilip jatyr», – deidi Pavlodar qalasy politsiia basqarmasy soltústik politsiia bóliminiń bastyǵy Bekzada Bólejanov.
Esterińizge sala keteiik, Qazaqstan Respýblikasy Qylmystyq kodeksniń 147-baby – jeke ómirge qol suǵylmaýshylyqty jáne Qazaqstan Respýblikasynyń derbes derekter jáne olardy qorǵaý týraly zańnamasyn buzý, kópshilik aldynda sóz sóileýde, kópshilik aldynda kórsetiletin týyndyda, buqaralyq aqparat quraldarynda nemese telekommýnikatsiia jelilerin paidalana otyryp, onyń ishinde internet arqyly, sol siiaqty adamǵa nemese onyń jaqyndaryna qatysty is-áreketter jasaý osy adamnyń qyzmetti júzege asyrýymen ne osyndai qyzmetke kedergi jasaý maqsatynda nemese ol úshin kek alý úshin kásiptik nemese qoǵamdyq boryshty oryndaýymen – úsh jyldan jeti jylǵa deiin bas bostandyǵynan aiyrý túrinde jaza qarastyrylǵan.
