Pavlodar oblysynda aýyzsýy tutynýǵa jaramsyz 69 aýyl bar. Jyl sońyna deiin onyń 9-ynda jaǵdai túzeledi dep kútilýde. Bul týraly Óńirlik kommýnikatsiialar qyzmetinde ótken baspasóz jiynynda oblystyq Taýarlar jáne kórsetiletin qyzmetterdiń sapasy men qaýipsizdigin baqylaý departamentiniń basshysy Irina Sorokina málim etti, dep habarlaidy "Ult aqparat" pavlodarnews.kz saityna silteme jasap.
«2018 jyly óńirdegi barlyq aýyldyq jerlerde aýyzsýdyń sapasyn tekserýdi qolǵa aldyq. Nátijesinde 85 aýyldyq jerdegi sýdyń sapasy talapqa sai kelmedi. Iaǵni, úlken uńǵymalar men jeke qudyqtar tekserildi. Búginde aýyzsýdyń sapasy nashar 69 aýyl bar. Zalalsyzdandyrý jumystary jasalýda. Keibir jerlerde tek súzgilerdi aýystyrý qajet boldy. Jyl sońynda 60 aýyl qalady degen oidamyz. 5 aýyldan turaqty túrde synama alyp otyramyz. Óitkeni, sý ylǵi ózgerip otyrady. Keide taza, keide talapqa sai bolmai shyǵady. Oblystyq Jer qoinaýyn paidalaný, qorshaǵan orta jáne sý resýrstary basqarmasymen birge jaǵdaidy baqylaýda ustap otyrmyz. Sý sapasyn jaqsartý úshin tiisti sharalar jasalýda», - dedi Irina Sorokina.
Onyń aitýynsha, óńirdegi sý qubyrlary da bakteriologiialyq kórsetkishke bailanysty tekseristen ótip turady. 94 sý qubyry baqylaýda. 230 synama alynyp, 9-y talapqa sai kelmegen.
«Sonymen qatar, sý qoimalarynan synamalar alyp otyramyz. Bular demalys oryndary. Bunda sýdaǵy virýstardy anyqtaý boiynsha sharalar atqarylady. Sýdaǵy virýstardan adamdar tsirrozdy meningitpen aýyrýy múmkin. Ol týraly budan buryn da aityldy. Ol – ýaqytsha aýrýlar. Biyl tsirrozdy meningittiń 37 oqiǵasy tirkeldi. Bul – qarapaiym maýsymdyq kórsetkish», - dedi ol.
Aita keteiik, biylǵy shomylý maýsymynda sý qoimalarynan 200-den astam synama alynyp, Pavlodar qalasyndaǵy jaǵalaý mańynan 5 synama talapqa sai bolmai shyqqan.
