Pavlodar qalasynyń ataýyn ózgertý týraly másele qarastyrylyp jatqan joq, dedi Pavlodar oblysy ákimi baspasóz qyzmetiniń jetekshisi Azamat Báitenov. Bul týraly Sputnik agenttigi jazdy.
"Men baspasózden bul materialdy oqydym, bul partiialardyń biriniń lideriniń jeke pikiri. Qazirgi tańda bul másele bizdiń kún tártibimizde turǵan joq", - dedi Azamat Báitenov.
Elorda ataýyn ózgertýdi qoldaýǵa arnalǵan "Qazaqstan-2050" demokratiialyq kúshterdiń jalpyulttyq koalitsiiasynyń otyrysynda "Aq Jol" demokratiialyq partiiasy tóraǵasynyń orynbasary Qazybek Isa úsh qala: Petropavl, Pavlodar jáne Semeidiń ataýyn ózgertý týraly másele kóterdi. Pavlodarǵa ol Kenesary hannyń atyn berýdi usyndy.
Aita keteiik, mundai usynys buǵan deiin de birneshe ret jasalǵan bolatyn. Ár jyldary Pavlodardy Kereký, Nurqala, Nurkent dep ataý týraly bastama kóterildi.
Esterińizge salaiyq, 23 naýryzda Qazaqstannyń elordasy Astananyń ataýy Nur-Sultan bolyp ózgerdi. Mundai tapsyrmany Qazaqstannyń jańa prezidenti Qasym-Jomart Toqaev berdi.
