Pavlodar oblysynyń ákimdiginde halyqtyń aryz-shaǵymyn beinesaýal retinde jazyp alatyn arnaiy kabinet ashyldy, dep habarlaidy "Ult aqparat".
Búgin óńir basshysy Instagram áleýmettik jelisindegi jeke paraqshasy arqyly úndeý jariialady. Oblys ákiminiń aitýynsha, oǵan osy ýaqytqa deiin halyqty tolǵandyrǵan 400-den astam habarlama kelipti.
"Qurmetti pavlodarlyqtar, Instagram jelisinde jeke paraqshamdy ashqanyma shamamen 2 ai boldy. Osy ýaqyt aralyǵynda maǵan 400-den astam túrli ótinish pen usynys kelip tústi. Men barlyq máseleden ózim habardar bolǵym keledi. Biraq barlyǵyna jaýap berýge ýaqyt tabyla bermeidi. Sebebi, bul máseleler zertteýdi talap etedi", - dedi ol óz video úndeýinde.
Osy oraida Bolat Baqaýov Pavlodar oblysy ákimdiginiń ǵimaratynda turǵyndar úshin arnaiy kabinet ashqanyn málimdedi. Endi pavlodarlyqtar ózderin tolǵandyrǵan másele boiynsha óńir basshysymen tikelei sóilese alady.
"Barlyǵyna qolaily bolý úshin oblystyq ákimdik ǵimaratynda kabinet ashý týraly sheshim qabyldadym. Oǵan árbir azamat kelip, ózin tolǵandyrǵan suraq boiynsha video úndeýin jazyp, ony maǵan qaldyra alady. Barlyq video úndeýdegi máseleni zerttep, sheshý úshin ony ózim jeke qaraimyn", - dep túiindedi sózin oblys ákimi.
Aita keteiik, qazirgi tańda Bolat Baqaýovtyń Instagram jelisinde 16,1 myń oqyrmany bar.
Esterińizge sala keteiik, osy jyldyń 27 naýryzynda Qazaqstannyń jańa Prezidenti Qasym-Jomart Toqaev Aqordada ákimderdi jinap, olarǵa halyqpen tyǵyz bailanys ornatýǵa tapsyrma bergen.
"Memlekettik organdar tarapynan kommýnikatsiianyń zamanaýi arnalaryn paidalana otyryp, tiimdi túsindirý jumystaryn júrgizý qajettigi atalyp ótti. Prezident óńir ákimderiniń halyqpen únemi kezdesýge jáne eldi mekenderdi jii aralaýǵa tiis ekenin de aitty", - dep jazǵan bolatyn Memleket basshysynyń baspasóz hatshysy Berik Qurmanǵali Facebook jelisindegi jeke paraqshasynda.
