QR Densaýlyq saqtaý vitse-ministri – Bas sanitar dáriger Erlan Qiiasov Májilis depýtattarynyń aldynda «Qazaqstan Respýblikasynyń biologiialyq qaýipsizdigi týraly» zań jobasyn tanystyrdy, - dep habarlaidy QazAqparat.
Áýeli biologiialyq qaýipsizdik salasyndaǵy kemshin túsip jatqan tustardy ataǵan vitse-ministri usynylyp otyrǵan qujattyń eń negizgi normalaryna toqtaldy.
«Patogendi bioagenttermen jumys isteitin sýbektilerdiń memleket tarapynan tiimsiz baqylanýy bioagentterdiń ýaqtyly profilaktikasyn júzege asyrýǵa múmkindik bermeidi. Buǵan tiisti nysandardyń tekserýmen tómen deńgeide qamtylýy jáne ondai tekserýlerdiń aldyn ala habarlaý arqyly júrgiziletini sebep bolyp otyr. Buǵan deiingi tájiribege súiensek, josyqsyz zerthanalar óz qyzmetin asa qaýipti patogendermen jumys isteýge tiisti ruqsatyn almastan júzege asyratynyn kórsetti. Olar nysanda tekserý bolatynyn aldyn ala bilgendikten, dál tekserý aldynda zańda tyiym salynǵan zattardy joiyp úlgeredi», - deidi Erlan Qiiasov.
Onyń aitýynsha, atalǵan norma biologiialyq nysandarǵa júrgiziletin tekserýlerdiń qoldanystaǵy sanyn kóbeitýdi kózdemeidi.
«Usynylyp otyrǵan negizgi zań jobasynda memlekettik baqylaý obektilerin táýekel deńgeiine qarai jikteý kózdelgen. Al ilespe zań jobasynda patogendigi I jáne II sanataǵy bioagenttermen jumys isteitin uiymdardyń tekserýden ótetini týraly aldyn ala habardar etý tetigi alyp tastalady. Bul qaýipti biologiialyq obektilerde bioqaýterlerdiń aldyn ala anyqtaýǵa jáne boldyrmaýǵa múmkindik beredi», - dedi Erlan Qiiasov.
Sondai-aq, vedomstvo ókili biologiialyq qateri bar zattarmen jumys isteitin oryndardyń jaýapkershiligin arttyrý boiynsha normalar daiyndalǵanyn eske saldy.
«Qoldanysta bar zańnamadaǵy úilesimsizdikter saladaǵy talaptardyń tómen deńgeide oryndalýyna áser etýde. Osyǵan bailanysty ilespe zań jobasynda qaýipti patogenderdi zańsyz qoldanǵany, ótkizgeni jáne urlaǵany úshin, sonyń saldarynan aýyr zardaptarǵa ákep soqtyrǵany úshin qoldanylatyn sharalardy qylmystyq jaýapkershilikke deiin kúsheitý usynylǵan», - dedi vitse-ministr.
