Qyrymbek Kósherbaev Tokio Paralimpiadasynyń jeńimpazdary men júldegerlerin marapattaý rásimine qatysty, dep habarlaidy "Ult aqparat" Aqordaǵa silteme jasap.
Qazaqstan Respýblikasynyń Prezidenti Qasym-Jomart Toqaevtyń Jarlyǵymen David Degtiarev III dárejeli «Barys» ordenimen, Zarina Baibatina, Temirjan Dáýlet, Ánýar Sarievter «Parasat» ordenimen, Nurdáýlet Jumaǵali «Qurmet» ordenimen marapattaldy.
QR Memlekettik hatshysy Qyrymbek Kósherbaev Japoniia astanasy Tokioda ótken XVI jazǵy Paralimpiada oiyndaryna qatysqan sportshylarmen kezdesip olarǵa memlekettik nagradalary men qarjylai sertifikattaryn tabystady.
– Keshe ǵana tórtkúl dúnie eren erik-jigerdiń, temirdei tózimniń, ómirge qushtarlyqtyń kýási boldy. Jaratqan adamnyń múmkindigin shektegenimen, nietin shektemeitinin kózimizben kórdik. Tokioda ótken Paralimpiada oiyndarynda taǵdyrdan teperish kórgen jandardyń erligine jer júzi tik turyp qurmet kórsetti. Olai bolýy zańdylyq edi. Óitkeni olar tepse temir úzetin, on eki múshesi din-aman, deni saý kei adamdar jete almaǵan jetistikke jetip, belesti baǵyndyryp, jeńis týyn jelbiretti. Rasynda, bul qandai qurmetke de, qoshemetke de laiyq áreket, – dedi Qyrymbek Eleýuly.
Sonymen qatar Tokio Paralimpiadasy elimiz úshin asa tabysty bolǵanyn, dúbirli dodada qazaqstandyq sportshylar 5 medal ielenip, elimiz úshin rekordtyq kórsetkish ornatqanyn atap ótti.
Qyrymbek Kósherbaev is-shara barysynda altyn medal alǵan David Degtiarevke 106 million teńge, kúmis medalge ie bolǵan Zarina Baibatina, Temirjan Dáýlet, Ánýar Sarievterge 63 million teńge, qola júldeger atanǵan Nurdáýlet Jumaǵalige 31 million teńge qarjylai syiaqy tabystady.
Saltanatty is-sharaǵa Premer-Ministrdiń orynbasary Eraly Toǵjanov, Mádeniet jáne sport ministri Aqtoty Raiymqulova qatysty.
Jiyn sońynda Qazaqstan sportshylarynyń atynan David Degtiarev pen Temirjan Dáýlet sóz sóilep, Memleket basshysyna alǵys aitty.
