Almaty jaily qalalyq orta basqarmasynda 28 Panfilovshylar parkin qaita qalpyna keltirý jumystary qalai júrip jatqanyn aityp berdi, dep habarlaidy "Ult aqparat".
Áleýmettik jelide qalyń kópshilik atqarylyp atqan jumystarǵa qatysty kóp syn aitqan bolatyn.
«Aitylǵan eskertýlerdi eskere otyryp, bul parkterdegi jumystar qala ákimi Baqytjan Saǵyntaevtyń baqylaýynda tur. Qala basshysy kún saiyn jumystyń esebin talap etip jatyr. Ákimdik ókili qurylys alańynda jumystardy jiti qadaǵalaýda. Osyǵan deiin bolǵan zań buzýshylyqtar úshin merdiger uiym jazasyn aldy», - dedi qoǵamdyq keńes otyrysynda basqarma basshysy Sapar Nurashev.
Onyń aitýynsha, merdiger kompaniia jarty million aqsha tólegen. Al joba quny 1 mlrd teńgege deiin ońtailandyryldy.
«Búginde memlekettiń 400 mln teńgesin únemdedik. Qoǵam belsendileri, jaqyn arada turatyn turǵyndar park ishinde sýburqaq salýdyń, jańa balalar alańynyń qurylysynyń qajet emestigin aitty. Qonaev kóshesinen máńgilik alaýǵa deiingi kespetas ta 2018 jyly jasalǵan jóndeý jumystarymen tóselip ketti. Tek buzylǵan asfalt betteri ǵana jamalyp, sýarý júiesi jańartylady.
Kólemi 17 ga bolatyn parkte 300 tekshe metr kólemdi rezervýar ornatylǵan. Sebebi, sonsha aýmaqty sýarý kerek. Odan bólek 210 oryndyq, ýrna ornatylady», - dedi Sapar Nurashev.
