Ótken jyly elimizde pandemiia etek jaiǵanda halyq jumyssyz qalyp, memleket tarapynan ýaqytsha qarjylyq qoldaýdyń kórsetilgeni aian. Aita ketsek, 42 500 teńge aiasynda kóptegen suraqtar men kúdiktiń týyndaǵany ras. Araǵa biraz ýaqyt salyp atalǵan máselege qatysty túsinikteme berildi, dep habarlaidy QazAqparat.
«Ótken jyly bastalǵan pandemiia bizge neni kórsetti? Ol tsifrlandyrýdyń mańyzdylyǵyn kórsetip otyr. Mysalǵa aitar bolsam, ótken jyly elimizde 42 500 teńgeniń halyqqa qalai berilgenin bilesizder. Daý-damai týdy, shýlattyq, halyqtyń qinalǵany ras. Qalai istedik, biz aldymen halyqtan ótinish qabyldadyq, oǵan bizdiń EGOV tótep bere almai basqa portal ashtyq. Ótinish qabyldanǵan soń, kimge berý nemese bermeý kerek ekenin anyqtaý úshin 1 ai ýaqyt joǵaltyp aldyq. Al negizinde tsifrlyq túrde ony 1 kúnniń ishinde anyqtaýǵa bolar edi. Osy oraida atalǵan qatelikti qaitalamaý úshin biz búginde memlekettik qyzmetti bir alańda iaǵni bir platforma arqyly kórsetý kerek degen oiǵa kelip otyrmyz», - dedi QR Tsifrlyq damý, innovatsiialar jáne aeroǵarysh ónerkásibi ministri Baǵdat Mýsin «Ashyq alań» telebaǵdarlamasynda.
