Pandemiialyq jaǵdai din ókilderiniń rýhani álemin álsirete alǵan joq. Bul týraly álemdik jáne dástúrli dinder kóshbasshylary sezi hatshylyǵynyń HIH otyrysynda Qazaqstan musylmandary dini basqarmasynyń tóraǵasy, bas múfti Naýryzbai qajy Taǵanuly aitty, dep habarlaidy QazAqparat.
«Adamzat balasy sanǵasyrlyq tarihymyzda talai syndarly sátter men synaqtardy, zobalań zamandar men náýbetterdi bastan keship keledi. Álemdi úreilendirgen qazirgi syn sátte de Adam men Haýanyń urpaqtary qabyrǵamyzdy qaiystyrmai, úmitsizdikke boi aldyrmai, bir-birimizge qamqor ári tirekshi bola bilýimiz qajet. Búginde úrei qushaǵyna enip, eleń-alań kúi keshken ár adam úshin jyly sózdiń ózi janǵa daýa, kóńilge medeý bolyp tur. Bul tusta dindarlar men din liderleriniń róli orasan zor bolyp otyr», - dedi QMDB tóraǵasy.
Bas múfti qazaq halqynda «Betege ketse – bel qalar, berekeń ketse – neń qalar?» degen ataly sóz bar ekendigin eske saldy.
«Alla elshisi aitqandai, jaqsy sóilep, ainaladaǵy adamdarǵa shýaq shashyp, úreige emes, úmitke qanat bitire bilsek qana álemdik pandemiiany jeńerimiz anyq. Meniń oiymsha, álemdegi pandemiialyq jaǵdai din ókilderiniń rýhani álemin álsirete alǵan joq. Pandemiia ýaqytynda meshitter men ǵibadathanalar esigi jabylǵanymen, saýap esigi jabylmaityny sekildi, din qyzmetkerleri qoǵamda izgilik pen meiirim syndy qundylyqtardy keńinen nasihattai bildi», - dedi Naýryzbai qajy Taǵanuly.
