Ózbekstan el aýmaǵyna kirýge jáne shyǵýǵa ishinara ruqsat berdi. Degenmen eldegi karantindik sharalar biylǵy jyldyń tamyzyna deiin uzartyldy, dep habarlaidy "Ult aqparat".
Arnaiy respýblikalyq komissiianyń sheshimimen sanitariialyq-epidemiologiialyq jaǵdaiy turaqtanǵan eldermen áýe qatynasy qalpyna keltirilmek. Maýsymnan bastap myna toptaǵy tulǵalarǵa Ózbekstanǵa kirýge jáne shyǵýǵa ruqsat etiledi:
- shet elderdiń diplomatiialyq ókildikteri men konsýldyq mekemeleriniń qyzmetkerleri men olardyń otbasy músheleri;
- investitsiialyq jobalar sheńberinde Ózbekstan Respýblikasynda jumys isteitin sheteldik kompaniialar men basqa da uiymdardyń mamandary;
- emdelýge keletin (ketetin) tulǵalar;
- shetelde jaqyn týystary nemese aýyr naýqas týysy bar adamdar;
- shet memleketterdiń diplomatiialyq ókildikteri men konsýldyq mekemeleriniń suraýy boiynsha Ózbekstan Respýblikasy arqyly basqa elderge jiberiletin (tranzitpen) adamdar;
- Ózbekstan Respýblikasynda turaqty tirkelgen shetel azamattaryna, azamattyǵy joq el turǵyndaryna, sondai-aq shet elde tirkelgen Ózbekstan Respýblikasynyń azamattary.
Sonymen qatar azamattarǵa oqýyn nemese jumysyn jalǵastyrý úshin Ózbekstannan ketýge ruqsat berilgen. Ushyp-qonýdyń barlyǵy sanitarlyq ereje men normalarǵa sáikes júrgiziledi.
Arnaiy respýblikalyq komissiia áýe reisterin jasyl, sary jáne qyzyl tús arqyly sanattarǵa bóldi.
«Jasyl» reis sanatyna sanitarlyq-epidemiologiialyq jaǵdaiy turaqty elder engen. Koronavirýs juqtyrý jaǵdaiy azaiǵan elder «sary» túspen belgilengen. Al «qyzyl» toptaǵylardyń qatarynda koronavirýs juqtyrý oqiǵasy azaimai turǵan elder bar.
