Ózbekstannyń Fergana oblysyndaǵy Tarih jáne mádeniet murajaiynda teńdessiz 70 eksponattyń jalǵan jádigerlermen almastyrylǵany anyqtaldy. Tarihi muranyń quny 2,5 mlrd ózbek somy nemese 230 myń dollarǵa baǵalanyp otyr.
Bul týraly Ózbekstannyń Mádeni mura agenttiginen málim boldy, dep habarlaidy «QazAqparat» HAA menshikti tilshisi.
«Arnaiy jumys toby murajai qoryn zertteý barysynda quny 2,5 mlrd ózbek somyn quraityn teńdessiz 70 eksponattyń (56-sy beineleý óneriniń týyndylary) jalǵan ekenin anyqtady. Sonymen qatar murajaida turýy tiis 1 beineleý óneriniń týyndysy men 1 grafikalyq shyǵarma joq bolyp shyqty», - delingen vedomstvonyń habarlamasynda.
Aita keterligi, 2011 jyly Fergana oblysynyń Ishki ister basqarmasyna 21 eksponat tapsyrǵan. 2016 jáne 2020 jyldar aralyǵynda olardyń tek 14-i ǵana qaitarylǵan. Qazirgi tańda Fergana oblysynyń Ishki ister basqarmasynda mundai qundylyqtardyń joq ekeni anyqtalyp otyr.
Agenttik ókilderi sondai-aq tekserý barysynda murajaidy kúrdeli jóndeýge bólingen 3,1 mlrd ózbek somynyń 1,4 mlrd somy urlanǵany anyqtalǵanyn habarlady.
Atalǵan derekter boiynsha qylmystyq is qozǵalyp, tergeý júrip jatyr.
Buǵan deiin Ózbekstan murajailarynan 30 jylda 3 myńnan astam teńdessiz mádeni qundylyqtar joǵalǵany habarlanǵan bolatyn. Keltirilgen shyǵyn kólemi 4 trln som nemese 357 mln dollardy quraidy.
Murajaidan urlanǵan qundylyqtardyń osynshama zor kólemde ekenin eskere otyryp, Ózbekstan prezidenti Bas prokýratýra, Týrizm jáne mádeni mura ministrligi basshylyq etetin komissiiaǵa Ózbekstan murajailaryndaǵy jádigerlerdiń barlyǵyn túgendep, jyl sońyna deiin olardyń elektrondy bazasyn jasaýdy tapsyrdy.
