Túrki keńesi mediaforýmynyń jumysy aiasynda QR Aqparat jáne qoǵamdyq damý vitse-ministri Kemelbek Oishybaev Túrkiianyń iri memlekettik mediaholdingi «TRT» basshysy Mehmet Sobadjimen kezdesti, dep habarlaidy "Ult aqparat" vedomstvonyń baspasóz qyzmetine silteme jasap.
Kemelbek Oishybaev media salasy mamandaryn oqytýdy uiymdastyrý jáne birlesken kontent qurý salasyndaǵy yntymaqtastyqty odan ári damytý qajettigine nazar aýdardy.
Óz kezeginde M.Sobadji «Qorqyt Ata» teleserialyn túsirýdi uiymdastyrý boiynsha birlesken joba qurýdy tolyq zerdeleýge daiyn ekenin bildirdi. Ol birlesken kontentti qurý Qazaqstan men Túrkiia halyqtarynyń mádeni bailanystaryn damytýǵa, sondai-aq týrizmdi damytýǵa yqpal etetinin atap ótti.
Esterińizge sala keteiik, 2021 jyldyń 22-24 qazan aralyǵynda Ystambulda Qazaqstan, Túrkiia, Ázirbaijan, Ózbekstan, Qyrǵyzstan, Túrkimenstan jáne Majarstan memlekettik organdary ókilderiniń, aqparat salasyndaǵy basshylar men sarapshylardyń, ǵalymdardyń, jýrnalisterdiń, blogerler men qoǵam belsendileriniń qatysýymen Túrki Keńesiniń mediaforýmy ótýde.
Forýmnyń kún tártibinde – túrki áleminiń damý perspektivalaryna, kinoindýstriiaǵa, áleýmettik jelilerge jáne óskeleń urpaqty tárbieleýge qatysty máseleler tur.
Forým jumysyna Qazaqstan delegatsiiasynyń quramynda QR Aqparat jáne qoǵamdyq damý vitse-ministri Kemelbek Oishybaev, Qazaqstannyń Azamattyq aliansynyń prezidenti Baný Nurǵazieva, elimizdiń jetekshi BAQ basshylary: Lázzat Tanysbai («Qazaqstan» RTRK), Eldos Nashirali (QazAqparat), «Qazaqfilm» AQ prezidenti Aqan Sataev, qoǵam qairatkeri Toǵjan Qojalieva, aktrisa Almira Tursyn jáne t.b. qatysady.
Forým erteń, 2021 jyldyń 24 qazanynda, tanymal túrik tarihi serialdary túsirilgen platformaǵa ekskýrsiiamen aiaqtalady.
