Túrkistan oblysynyń Otyrar aýdanyndaǵy qorjyn úi úlgisinde salynǵan Shámshi Qaldaiaqovtyń murajaiynda 120-dan astam jádiger qoiylǵan. Oblys ákimdiginiń ideiasy boiynsha ári demeýshilerdiń kómegimen ashylǵan murajai úii Shámshi Qaldaiaqov saiabaǵynda ornalasqan, dep habarlaidy "Ult aqparat".
Belgili kompozitor halqymyzdyń bir týar azamaty Sh.Qaldaiaqovqa 90 jyl tolýyna oraiashylǵan murajai úiinde kompozitorǵa qatysty ári ózi tapsyrǵan zattary kópshilik nazaryna usynylǵan. Atap aitqanda múshtigi, mondolinasy, Otyrardaǵy toi notasynyń túpnusqasy, baskiimi men qatar estelik sýretteri bar. Sondai-aq, ákesi Qaldaiaq ustaǵa qatysty sandyqshasy men bilik tósi, qol sharyǵy jáne basqada qural saimandary men maily boiaýmen salynǵan Sh.Qaldaiaqov pen Qaldaiaq ustanyń portreti bar. Bul nysan elimizde kompozitor Shámshi Qaldaiaqovqa arnalnalǵan tuńǵysh ári jalǵyz murajai sanalady. Túrkistan oblysy ákiminiń orynbasary Sáken Qalqamanovtyń aitýynsha, bul murajai úiin ashý týraly ideia ótken jyly týyndaǵan.
«Arystyń ortasynda jolda júrgende, Shámshi Qaldaiaqov atyndaǵy shaǵyn aýylǵa kózim tústi. Birneshe kúnnen soń qolym qalt etkende sol aýylǵa soǵyp, uly kompozitordyń balalyq shaǵy ótken, mandolinany alǵash úirengen úiiniń ornyn ǵana taptym. Dál sol kezde Shámshiniń mýzei úiin salý týraly ideia týyndady. Bul bastamany oblys basshysy Ómirzaq Shókeev birden qoldady. Otyrar aýdanynyń ákimimen birge Shámshiniń kózin kórgen, osy aýylda burynnan turatyn qariialarmen sóilestik. Saz balshyqtan soǵylyp, tóbesi qamyspen jabylǵan shaǵyn úidiń jobasyn daiarladyq. Sazgerdiń úii túpnusqa qalpynda turǵanyn qaladyq. Mýzei qurylysyna biýdjetten aqsha bólingen joq. Demeýshiler qurylys materialdaryna kómek berse, jergilikti turǵyndar Shámshiniń úiin erekshe yqylaspen salýǵa járdem berdi. Aýdan jáne aýyl halqy Shámshige qatysy bar qundy jádigerlerdi ákelse, QR Ulttyq mýzeii jáne oblystyq mýzei Shámshiniń áigili qarakól bas kiimin, qoiyn dápterin, notalaryn, mandolina sekildi zattaryn tartý etti. Mýzei ishine kirseń qazaqtyń talantty ulynyń shyǵarmashylyq qýatyn sezinesiń», - dedi Sáken Qalqamanov.
Aldaǵy ýaqytta Shámshi muraǵatyn kútip-baptaý úshin mekeme oblystyq mýzeidiń filialy retinde ashylyp, arnaiy shtat sanymen mamandary jumys isteitin bolady dep josparlanyp otyr. Al, bolashaqta Shámshiniń ánin súiip tyńdaityndar men týristerdi qyzyqtyratyn oryn bolary sózsiz.
«Búgin elimizdiń Ánurany «Meniń Qazaqstanym» ániniń avtory, ult rýhaniiatyna talai syrly saz ben ásem áýen syilaǵan kompozitor Shámshi Qaldaiaqovtyń týǵanyna 90 jyl toldy. Shámshi shyǵarmashylyǵy – ulttyń baǵa jetpes bailyǵy. Onyń týyndylaryn keńinen nasihattaý – búgingi urpaqtyń paryzy», dep jazdy Qasym-Jomart Toqaev Twitter-degi paraqshasynda.
