Aqparat jáne qoǵamdyq damý ministri Aida Balaeva turmystyq zorlyq-zombylyqpen kúres baǵytynda birlesken júieli jumystar kerektigin aitty, dep habarlaidy QazAqparat.
«Dóńgelek ústel otyrysyna qatysqandardyń barlyǵy talqylanyp jatqan zań jobasy aiasynda, sondai-aq osy baǵyttaǵy jalpy qadamdardy jetildirý boiynsha birlese jumys isteýge daiyn ekendikterin bildirip otyrǵandyǵy qýantady. Barshasy júieli jumys pen kúsh-jigerdi biriktirýdiń mańyzdylyǵyna erekshe toqtaldy. Osy turǵyda azamattyq qoǵam men barlyq memlekettik organdar bar», - dedi ministr onlain rejimde ótken talqylaýda.
Vedomstvo basshysy Aqparat jáne qoǵamdyq damý ministrligi problemany tyńǵylyqty talqylaý úshin barlyq úkimettik emes uiymdarmen (ÚEU) yntymaqtastyqta jumys isteitinginin jetkizdi.
«Salynǵan qarjynyń áleýmettik oń áseri mańyzdy, iaǵni, naqty kómek bolýy tiis. Memlekettik áleýmettik tapsyrys bekerden qalyptastyrylmaidy, memleket tiisti máselelerdi sheshý maqsatynda osy qarjyny ÚEU-lar qyzmetine baǵyttaidy. Bul baǵytta sheshimin jasaityn máseleler bar, sáikesinshe, osy taqyrypqa oralamyz», - dedi ministr.
A. Balaevanyń atap ótýinshe, turmystyq zorlyq-zombylyqqa qarsy kúres sharalaryna qoǵamnyń qatysýy mańyzdy bolyp otyr. Zorlyq-zombylyqtyń aldyn alý sharalarymen júieli ainalysý kerek.
«Osy tektes talqylaý alańdary bolady. Biz belsendi dialogqa daiynbyz», - dedi ministr.
