Otbasylyq jáne genderlik saiasat tujyrymdamasyna ózgerister engiziledi. Bul týraly Úkimet otyrysynda QR Aqparat jáne qoǵamdyq damý vitse-ministri Serik Egizbaev aitty, dep habarlaidy QazAqparat.
«Kelesi baǵyt – Otbasylyq jáne genderlik saiasat tujyrymdamasyna ózgerister engizý. Birinshiden, tujyrymdama memlekettik josparlaý júiesiniń talaptaryna sai keltiriledi jáne áielderdi qoǵamdyq-ekonomikalyq, saiasi ustanymdarda qamtamasyz etý, sondai-aq otbasynyń ómir súrý sapasyn arttyrý, ana men balany qorǵaý jónindegi aldymyzdaǵy maqsattardy eskere otyryp ózektendiriledi», - dedi ol.
Sonymen qatar vitse-ministr Prezident Joldaýyn aqparattyq qoldaý jumystaryna da toqtaldy.
«Joldaýdan keiin birden saraptamalyq qoldaý bastaldy. Qazirdiń ózinde Joldaýdyń negizgi baǵyttaryn túsindiretin 150-den astam spiker men sarapshy tartyldy. Kesheden beri barlyq BAQ-ta jáne áleýmettik jelilerde myńnan astam material jaryq kórdi. Bul baǵyttaǵy jumys odan ary jandanatyn bolady. Jekelegen media jospar daiyndalady», - dedi Serik Egizbaev.
