QR Densaýlyq saqtaý ministri Aleksei Tsoi qazaqstandyq vaktsinanyń halyqaralyq deńgeide moiyndalýy týraly pikir bildirdi, dep habarlaidy QazAqparat.
«Vaktsinany halyqaralyq aýqymda taný rásiminiń óte uzaq ekenin bilesizder. DDSU vaktsina óndirisi burynnan jolǵa qoiylǵan eldiń ekpelerin tez moiyndaidy. Óitkeni ondai jerlerde tutas júie ornatylǵan. Qazaqstan mundai akkreditteýden alǵash ret ótip otyr. Ol kóp nársege bailanysty: zerthananyń akkredittelýine, óndiristik bazaǵa, qujattardyń qalyptasýyna, halyqaralyq basylymdardaǵy jariialanymdarǵ bailanysty. Qazir biz sonyń bárin qalyptastyryp jatyrmyz. Tájiribe de jinaqtalýda. Akkreditteýden ótýge qajet qujattardyń bárin daiyndap jatyrmyz», - degen vedomstvo basshysy otandyq ekpeniń ulttyq retteýshiniń tirkeýinen ótkeni onyń qaýipsizdigi men tiimdiligine kepil ekenin atady.
«DDSU maquldasa da, maquldamasa da, otandyq ekpe bizdiń Ulttyq retteýshiniń tirkeýinen ótti jáne tiimdi ári qaýipsiz ekenin dáleldedi. 20-dan astam elmen ózara vaktsinatsiia pasporttaryn moiyndaý týraly kelisim bar ekenin bilesizder. Bul olardyń vaktsinanyń qýatyn jáne Ulttyq retteýshiniń qorytyndysyn moiyndaityndyǵyn bildiredi. Sondyqtan vaktsinamyzdy halyqaralyq deńgeide tanytý isi – Qazaqstandy damyǵan otyz eldiń qataryna kirgizý siiaqty uzaqmerzimdi mindet», - dedi Aleksei Tsoi.
