QR Aqparat jáne qoǵamdyq damý ministrligi otandyq telearnalar men baǵdarlamalardyń reitingilerin live-rejimge shyǵarady. Bul týraly vedomstvo basshysy Aida Balaeva málim etti, habarlaidy QazAqparat tilshisi.
«Qazir internet saittar – ámbebap habar taratý quralyna ainalǵanyn kórip otyrmyz. Búginde bir saittyń ishinen jazba aqparatty da, aýdio habarlamany da, beine-baǵdarlamalardy da tabýǵa bolady. Mysaly búginde memlekettik qoldaýǵa ie e-history.kz, adebiportal.kz, el.kz, inform.kz, baq.kz siiaqty saittarda qazaq tilindegi materialdar zamanaýi formattaǵy beine jazbalar, aýdiopodkastar oqyrmandarǵa qoljetimdi. Búginde jastar arasyndaǵy eń suranysqa ie qosymshalardyń biri – «TikTok» áleýmettik jelisi. Bul rette, e-history.kz portaly «Tiktoker tarihshy» paraqshasyn ashyp, jastarǵa jeńil ári qysqa túrde elimizdiń tarihyn túsindiretin aqparat beredi», - dedi Aida Balaeva Qazaq tilinde kontent jasaýshylardyń dástúrli forýmynda.
Ministr osy aidan bastap otandyq telearnalardyń reitingi onlain rejimge shyǵarylatynyn jetkizdi.
«Buǵan deiin qoǵam tarapynan media ólsheý júiesin jetildirý týraly usynystar aitylǵan bolatyn. Osy oraida, biz osy aidan bastap ministrliktiń saitynda zamanaýi IP tehnologiialardy paidalana otyryp, jańa júieni iske qostyq. Onyń negizinde, qyzyǵýshylyq tanytqan kez kelgen azamat barlyq qazaqstandyq telearnalar men baǵdarlamalardyń reitingilerin live-rejimde kóre alady. Qazir otandyq kontentti qaraýshylar úlesi úlken qarqynmen ósip keledi. Búginde Qazaqstan media naryǵyndaǵy shet eldik jáne otandyq arnalar reitingisinde úzdik TOP-10-dyqty bizdiń otandyq telearnalar ielendi. Munyń ózi bizdiń ulttyq teleónimderdiń básekege qabiletiniń jyldan-jylǵa artyp kele jatqanyn kórsetedi», - dedi ministr.
