«Nazarbaev Ziiatkerlik mektepteri» derbes bilim berý uiymynda Uly Jeńistiń 75 jyldyǵyna arnalǵan «Otan úshin ot keshken batyrdyń biz urpaǵymyz!» mereitoilyq marafony aiaqtaldy. Patriottyq jobanyń basty maqsaty – Uly Otan soǵysy tarihyndaǵy naqty bir otbasynyń tarihyn eske alý. Ziiatkerlik mektepterdiń oqýshy, muǵalim jáne ata-anasy óz otbasylarynyń tarihyn maidannan kelgen hattar men sýretter, sonymen qatar soǵys jáne tyl ardagerleriniń estelikteri arqyly usyndy, – dep habarlaidy NZM baspaóz qyzmeti.
Marafon boiy áleýmettik jelilerdegiNIS-tińresmi akkaýnttaryndaǵy jariialanymdar Uly Jeńiske arnalady. Onlain formatta shańyraqtarda maidan jáne tyl ardagerlerimen kezdesý, «Uly Jeńiske taǵzym» erlik sabaqtary ótip, «Meniń otbasymnyń ardager batyry» zertteý jobalarynyń qorytyndysy jariialandy. Qashyqtan formatyndaǵy «Ol kúnderdiń dańqy óshpeidi» án chellendji, «Men batyrdyń urpaǵymyn» art chellendji, «Uly Jeńisti jyrlaimyz» kórkemsóz oqýlary kóptiń qyzyǵýshylyǵyn týdyrdy. Ár mektepte oqýshylar otbasy muraǵatynda saqtalǵan maidan hattary men sýretterin kórsetken «Soǵys týraly monolog», «Maidannan hat», «Otty jyldar jańǵyryǵy – otbasymda» derekti filmderi daiyndaldy.Dala poshtasynan joldanǵan árbir sarǵaiǵan úshbý hatta beibit ómir týraly armandar men josparlar, úi ishi jáne jan dostarmen habar almasý, týǵan jerine degen saǵynysh jatyr.
Nur Sultan qalasy fizika-matematika baǵytyndaǵy Nazarbaev Ziiatkerlik mektebiniń oqýshysy Damir Bekenovtiń atasy Qadan Bekenov Berlindi alýǵa qatysqan. Qaraǵandy qalasyndaǵy NZM-nen Miras Daýytqazynyń atasy, áskeri dáriger Shárip Seksenov maidan dalasynda 15 500-den astam ota jasapty.Óskemendik ziiatker Aldiiar Aýbakirovtyń atasy Mahmet Qaiyrbaevqa Keńes Odaǵynyń Batyry ataǵy berildi. Taraz qalasyndaǵy Nazarbaev Ziiatkerlik mektep muǵalimi Elmira Akimovanyń ákesi, ustaz Tursyn Akimov sum soǵys bastalysymen óz erkimen maidanǵa attanǵan. Almatylyq himiia-biologiia baǵytyndaǵy mektepten Bogdan Mironovtyń atasy Grigorii MironovLadoga kóliniń áigili «Ómir jolymen»Leningrad blokadasyna azyq-túlik jetkizipti. Tegin búginde Qostanaidaǵy Ziiatkerlik mektep oqýshylary Diar men Sanjar Kýstavletovter alǵan Abdrahman Kýstavletov óziniń uly Ahmetbekti atqyshtar mektebinde kezdestirgen. Elordadaǵy fizika-matematika baǵytyndaǵy Ziiatkerlik mektepten Batyrhan Sarsenovtyń atasyShamsýtdin Sarsenovkeńes barlaýshylary quramynda Tegeran konferentsiiasynda «Úlken Úshtik» kóshbasshylarynyń qaýipsizdigin qamtamasyz etti. «Bilimge umtylyńyzdar!» – shymkenttik fizika-matematika baǵytyndaǵy mektep oqýshysy Abylai Keńestiń atasy Anas Alimov nemerelerine osyndai ósiet qaldyrdy. Jeńis marafony kezinde otbasy muraǵatyndaǵy áserli, jan teberinter júzdegen biregei oqiǵa baiandaldy.
Soǵys jyldarynda Oral qalasynyń úsh aerodromynan áigili ushqyshtar Hiýaz Dospanova men Leonid Beda áýege kóterilgen, biriniń ornynda qazir Nazarbaev Ziiatkerlik mektebi ornalasqan. Densaýlyǵyna bailanysty maidan qataryna alynbaǵan Ádilbek Demesinov bar múlkine áskeri ushaq satyp alyp, tylda naǵyz erligimen tanylǵan. Ivan Sýsanin atyndaǵy kostromalyq murajaida 53-shi Sýsanin retinde Baishyǵan Bekturliev aty tur, onyń erliginiń arqasynda Qazaqstannyń batysynda Gýrev munai óńdeý zaýytyna bara jatqan jaý desanty joiylǵan, aty ańyzǵa ainalǵan aqsaqal – oraldyq Ziiatkerlik mektep oqýshylary Áli men Merei Esengeldinderdiń atasy. 9 mamyr kúni pavlodarlyq ziiatker Arýjan Halyqovanyń apasy, tyl ardageri Kúljaýpar Qojanovaǵa Resei Federatsiiasynyń Prezidenti Vladimir Pýtin atynan «Uly Otan soǵysyndaǵy Jeńiske 75 jyl» mereitoilyq medali tabystaldy. Qaraǵandy qalasyndaǵy Nazarbaev Ziiatkerlik mektebiniń «Meiirimdilik kópiri» volonterlik klýby júrgizgen áleýmettik-zertteý qorytyndysy boiynsha «Sled voiny v istorii moei sýdby» atty jinaq shyqty. Oraldaǵy Nazarbaev Ziiatkerlik mektebinde ótken «Kesteli oramal» aktsiiasy kezinde oqýshylar men muǵalimder soǵys pen tylda ter tókken ardager týystarynyń atyn kestelep jazdy. Jeńiske 75 jyl tolǵanda Aqtaý qalasyndaǵy Nazarbaev Ziiatkerlik mektebiniń muǵalimi Svetlana Ozgan áriptesteriniń kómegimen atasy Ozgan Kosanovtyń jerlengen jerin tapty, otbasy bul izdeýdi 1943 jyly bastaǵan eken.
Júzdegen áńgimeler men filmder, maidan hattary men sýretter – barlyǵy da Uly soǵystyń jáne onyń maidany men tylynda erlik kórsetken eń jaqyn adamdardyń shynaiy ári egjei-tegjeili kelbeti, al ondaǵy keiipkerlerdiń aty marafonǵa qatysýshylardyń maqtan tutar tegine ainalǵan. Estelikter lentasynda oqýshylar Jeńis kúnin nelikten kózdi jasqa toltyra toilaityn mereke ekenin túsingenderin, maidan hattary men sýretter, jerleý týraly habarlamalar, orden kitapshalary, áskeri marapattar, ardagerlerdiń qol saǵattary – árbir qazaqstandyq otbasy úshin qundy jádigerler ekenine kóz jetkizgenderin moiyndady.
«Otan úshin ot keshken batyrdyń biz urpaǵymyz!» marafony Nazarbaev Ziiatkerlik mektepteriniń barlyq oqýshylary úshin erlik pen patriotizmnen syr shertken shynaiy sabaqqa ainaldy. Qazirgi tańda NIS jelisinde elektrondy «Estelikter muraǵatyn» jasaý qolǵa alynǵan. Aitýly marafondy dástúrli túrde jyl saiyn mamyrdyń birinshi onkúndiginde ótkizý josparlanyp otyr.
