Foto: ashyq derekkóz
28 aqpan tańerteń Izrail AQSh-pen birlesip Iranǵa qarsy «Arystannyń aibaty» (amerikalyq ataýy — «Epikalyq qahar») atty áskeri operatsiia bastady.
AQSh prezidenti Donald Tramp operatsiianyń basty maqsattaryn atady: Iranda bilikti ózgertý, Tegerannyń iadrolyq qarý alýyna jol bermeý jáne eldiń áskeri áleýetin joiý.
Operatsiia barysynda 86 jastaǵy Irannyń joǵarǵy kóshbasshysy Ali Hamenei qaza tapty. Ol 1994 jyldan beri uly aiatolla titýlyn ielengen. Onyń rezidentsiiasy tolyqtai qiratylǵan. Izraildiń «12-arnasy» keshenge 30 bomba tastalǵanyn habarlady.
Sondai-aq Iran Islam revoliýtsiiasy saqshylar korpýsynyń qolbasshysy Mohammed Pakpýr, qorǵanys ministri Aziz Nasirzade, Qaýipsizdik keńesiniń hatshysy Áli Shamhani, taǵy tórt joǵary laýazymdy áskeri sheneýnik jáne Hameneidiń birneshe týysy qaza tapqany habarlandy.
Donald Tramptyń aitýynsha, Iran biligi iadrolyq kelisimge jaqyn qalǵan, alaida keiin «shegingen». Osydan keiin Vashington Tegeran «kelisimge múddeli emes» degen qorytyndy jasaǵan.
Áýe soqqylaryna Izrail áskeri-áýe kúshteriniń 200-den astam ushaǵy qatysqan — bul Izrail aviatsiiasy tarihyndaǵy eń aýqymdy operatsiia sanalady. AQSh soqqylardy, sonyń ishinde aimaqqa sońǵy ailarda jiberilgen kemelerden ushyrylǵan Tomahawk zymyrandarymen jasaǵan.
Izrail soqqysy saldarynan Irandaǵy qyzdarǵa arnalǵan bastaýysh mektep qiraǵan. Fars agenttiginiń sońǵy deregine sáikes, 115 adam qaza tapqan. Qyzyl Jarty ai uiymy Tasnim agenttigine Iranda soqqylardan 201 adam qaza taýyp, 747 adam jaralanǵanyn málimdegen.
Izrailde irandyq soqqylar nátijesinde bir adam qaza taýyp, 120-dan astam adam zardap shekkenin CNN habarlady. Iran Kýveitte, Iraktyń soltústiginde jáne Saýd Arabiiasynda ornalasqan AQSh áskeri bazalaryna shabýyl jasaǵan. Sondai-aq Katardaǵy AQSh áýe bazasyna jáne Dýbaidaǵy TsRÝ shtab-páterine soqqy jasalǵany belgili. Bahreinde de Iran shabýyly týraly málimdeldi. Katarda zymyran synyqtarynan 16 adam jaralanǵan. Dýbaida soqqylardan keiin áýejaidyń tórt qyzmetkeri zardap shekken.
Munai tasymalyna da áseri baiqaldy: keme qatynasyna tyiym salyndy degen habarlardan keiin tankerler Ormýz buǵazy arqyly ótýden bas tarta bastaǵan.
