Óskemendegi «Sakraldy geografiia» atty kórmede 600-ge jýyq altyn buiym qoiyldy, dep habarlaidy "Ult aqparat".
«Sakraldy Qazaqstan» jobasynyń aiasynda uiymdastyrylǵan kórme Shyǵys Qazaqstan oblystyq tarihi-ólkentaný mýzeiinde ótip jatyr. Bereldegi «Patshalar jazyǵy», Shilikti qorymy men Eleke sazy jailaýynan qazylǵan arheologiialyq jádigerler 30 qyrkúiekke deiin 4200 adamnyń nazaryna usynylmaq.
«Kórmeniń basty jádigeri – «Altyn adam». Odan bólek 1200 eksponat qoiylǵan. Sonyń teń jartysy altyn buiymdar. Saq jáne ǵun, kóne túrki qorymdarynan tabylǵan arheologiialyq zattar Altai baýraiyndaǵy kóshpeli órkeniettiń qanshalyqty ozyq bolǵanyn kórsetedi. Qyrkúiektiń ortasyna qarai bulardyń qataryn jańa jádigerler tolyqtyrady. Biylǵy arheologiialyq qazba jumystary kezinde tabylǵan buiymdarǵa arnaiy oryn qaldyryp qoidyq. Olar qazir qaita jóndeýden ótip jatyr», - deidi mýzeidiń tarihshy-arheolog mamany Galina Kýsh.
Eske salsaq, belgili arheolog Zeinolla Samashev Qasym-Jomart Toqaevtyń qabyldaýynda bolyp, ShQO-daǵy saq dáýiriniń alǵashqy kezeńine jatatyn qonystardaǵy qazba jumystary, Berel qorǵanyndaǵy arheologiialyq zertteýlerdiń qorytyndysy jáne sheteldik ǵalymdarmen áriptestik týraly aityp bergen bolatyn.
