«TALAP qoldanbaly zertteýler ortalyǵy» qoǵamdyq qorynyń prezidenti Rahym Oshaqbaev Facebook-paraqshasynda koronavirýsqa qarsy vaktsinalaýdy úgitteitin Azamattyq shtab qurý týraly usynys bildirdi, dep habarlaidy QazAqparat.
«Daǵdarys beleń alyp tur. Qazaqstanda halyqtyń tek 29% ekpe aldy. Salystyrsaq, Kanadada azamattardyń 72%, Ulybritaniiada – 69%, Italiiada – 64%, Frantsiiada – 62%, Germaniiada – 61% AQSh-ta – 57% vaktsina alǵan. Ispaniialyqtardyń ekpe qabyldaý qarqyny tańǵaldyrady – táýlik saiyn 500 myń adam alyp jatyr. Azamattarynyń 68% vaktsinalanǵan. Damyǵan álem delta-shtamǵa qaramastan, maskalyq rejim men shekteýlerdi ala bastady. Koronavirýstan keletin ólim sany kúrt azaidy. Al bizde vaktsinatsiia turalaýda», - degen qoǵam belsendisi bulai jalǵasa berse, karantin men lokdaýnnan kóz ashpaitynymyzdy, shaǵyn jáne orta biznestiń qaita eńse tiktei almaityndai bolyp kúireitinin eskertedi.
Sarapshy áleýmettik jelide bir-birine «Imandy bolsyn» dep kóńil aitý kóbeiip turǵanyn da virýstyń báseńdemeýimen, vaktsina alý qarqynynyń jetkiliksizdigimen bailanystyrady.
Vaktsinatsiiany halyqtyń bilikke degen senim deńgeiin kórsetetin referendýmǵa teńegen Rahym Oshaqbaev ekpe alýshylardyń sylbyrlyǵy bilikke eldiń senimmen qarai almaitynyn kórsetti dep otyr.
«Kez kelgen resmi aqparat, onyń ishinde vaktsinanyń qajettigi týraly málimet birden joqqa shyǵarylady nemese manipýliatsiia retinde qabyldanady. Adamdar resmi málimetke, memlekettik qyzmetshilerdiń málimdemelerine senbeidi. Vaktsinatsiia naýqany – bir jaǵynan IQ synaǵy. Biz qazir meditsinanyń, ǵylymnyń jetistikterin joqqa shyǵaryp, «chipteý», «5G» siiaqty qastandyq teoriialaryna sený arqyly intellektimiz ben syni oilaý deńgeiimizdi kórsetip otyrmyz», - deidi qoǵamdyq qor prezidenti.
Onyń paiymynsha, vaktsinalaýǵa kedergi bolyp turǵan taǵy bir faktor – jelidegi popýlizm.
«Antivakserler bizdiń sheneýnikterdiń biliksizdigi men ekijúzdiligin paidalanyp, jalpy narazylyqtyń tolqynyn qalaýynsha burmalap, tulǵalyqqa umtylýda. Biz eń tanymal degen 10 antivakserdiń akkaýntyn zerdeledik. Oqyrmandarynyń jalpy sany 6,2 millionnan asady. Oilanatyn jait! Kez kelgen saiasi oppozitsiia jolda qalady. Sonymen qatar, bul adamdar ortalyq telearnalar men negizgi internet-portaldarda erkin kósilip júr. Antivakserler biliktiń olardyń aldyndaǵy dármensizdigi men úreiin kórgen saiyn ózderiniń dańqy men jazasyzdyǵyna mastanyp júr. Prezidenttiń antivakserler týraly sózinen keiin-aq olar Densaýlyq saqtaý vitse-ministrine qol kóterip, jazasyz qaldy. Munyń bári bilik pen júieniń dármensizdigi týraly kúdikti qoiýlatyp otyr. Kóz aldymda antivakserler jastar úshin tartymdy tulǵaǵa ainalyp jatyr», - dep keiidi belsendi.
Sarapshy munyń bir sebebin azamattyq qoǵamnyń qaýqarsyzdyǵynan kórip otyr. Ol bul qaýqarsyzdyqtyń astarynda azamattyq qoǵamnyń alaýyzdyǵy jatqanyn aitady. Eski renishter men qyzǵanyshqa boi urǵan báseke taraptardyń bir maqsatqa jumylýyna kedergi keltirip tursa kerek. Rahym Oshaqbaev bul istegi BAQ-qa júkteletin mindetke de erekshe toqtalǵan.
«Men barsha aqyl-esi durys adamdarǵa birigip, vaktsinatsiiany úgitteitin Azamattyq shtab (jobalyq keńse) siiaqty uiym qurýǵa talpynbaqshymyn. Ujymdyq immýnitetke qol jetkizý, shekteýlerdi alyp tastaý jáne pandemiiadan arylý úshin biz qarsy kórsetilimderi joq 5 million eresek otandasymyzdy vaktsinanyń qajettigine ilandyrýymyz kerek. Aldaǵy 3 aiǵa jospar quraiyq. Azamattyq qoǵam qalypty ómirge oralý úshin ne istei alady? Bizdiń TALAP ortalyǵy vaktsinalaý týraly azamattyq naýqandy qoldaýǵa aiyna 3 mln teńge bólýdi uiǵaryp otyr», - dep úndeý tastady belsendi.
Rahym Oshaqbaevtyń usynysy boiynsha shtabqa múshe bolǵan adamdar kúndelikti ómirde vaktsinanyń kerektigin nasihattaýy kerek. Ol úshin mynadai qyzmetterdi úilestirý qajettigi týyndaidy:
- aqparatty jinap, tekserýmen ainalysatyn analitikalyq jáne áleýmettik zertteýler júrgizý,
- vaktsinany úgitteitin zamanaýi kontent uiymdastyrý,
- WhatsApp-toptarda, basqa da áleýmettik jeli alańdarynda vaktsinany úgitteitin kontentti taratatyn SMM-toptardyń jumysyn úlestirý,
- biznespen, iri jumys berýshilermen, Ahyq kóshbasshylarmen jáne kósh sońyndaǵylarmen jumys júrgizý.
- vaktsinalardyń janama áserleri týraly senim telefonyn qurý.
Rahym Oshqabev bul jumystardyń bárin múltiksiz oryndaý úshin Azamattyq shtab quramyna mynadai mamandardyń sanatyn shaqyrady:
- narazy túsiniktegi adamdarmen jumys isteitin dárigerler, infektsionister,
- úgitshiler men nasihatshylar,
- vaktsinatsiia pýnkterin baqylaý, tólqujat satýmen ainalysatyndardy tekseretin eriktiler.
