Qaraǵandy oblysynyń Ulytaý aýdanynda tótenshe jaǵdaidyń aldyn alý jáne joiý boiynsha aýdandyq komissiia jumys isteidi. Aýdanda barlyǵy 39 jer paidalanýshy zardap shekti. Olardyń jaiylymdary órtendi jáne bir sharýa qojalyǵy 318 malynan aiyryldy, dep habarlaidy "Ult aqparat".
Qaraǵandy oblysy ákiminiń orynbasary Serik Shaidarov zardap shekkenderge qandai qoldaý kórsetiletinin túsindirdi.
Ákim orynbasary fermerlermen, onyń ishinde maly qyrylǵan sharýa qojalyǵynyń basshysy Saǵyntai Ábdibekovpen kezdesti. Táýelsiz sarapshy fermerdiń shyǵynyn baǵalaidy. Oǵan naryq quny boiynsha ótemaqy tólenedi.
«Men mal sharýashylyǵymen 1996 jyldan beri ainalysamyn. Osyndai jaǵdai bizdiń fermada alǵash ret boldy. Órt tez tarady. Jel ekpindi bolyp, baǵytyn ózgertti. Biz tipti maldy qaýipsiz jerge shyǵaryp úlgermedik. Bári oidaǵydai bolady dep úmittenemin. Oblys ákiminiń orynbasary, jergilikti ákim, aýdan basshysy da menimen bailanysqa shyqty. Kómektesýge ýáde berdi. Qiyndyqta qaldyrmaǵandaryńyzǵa rahmet!», – deidi Saǵyntai Ábdibekov.
Jaiylymdyq jerler men shabyndyq jerlerden aiyrylǵan fermerlerge de qiyn jaǵdaidan shyǵýdyń sheshimderi usynyldy.
«Qazir aýdannyń kóptegen fermerleri zardap shekken fermerlerge shóp shabý jáne mal jaiý úshin óz jerin berýdi usynady – bul bir sheshim. Ekinshisi – bir jylǵa óteýsiz memlekettik jer bólemiz. Mundai shartty jasaýǵa Jer kodeksi múmkindik beredi», – dep túsindirdi Serik Shaidarov.
