Almaty qalasy Áýezov aýdandyq politsiia bóliminiń aǵa detektivi Aslan Álserovtiń ólimine qatysty tyń málimetter jariia boldy. Almaty oblysynda órtengen kúii tabylǵan politsiia qyzmetkeriniń qazasy qoǵamda úlken rezonans týdyrǵan edi, dep habarlaidy ult.kz.
"Vremia" basylymynyń dereginshe, qaiǵyly oqiǵa politsiia kúni qarsańynda bolǵan. Sol kúni marqum jumystan úiine kesh oralǵan. Onyń sol sátte ishimdik ishken-ishpegeni ázirge naqty belgisiz. Aldyn ala aqparat boiynsha, úi ishinde ustara júzine qatysty daý týyndap, keiin janjal tóbeleske ulasqan bolýy múmkin.
Marqumnyń jubaiy da buryn politsiia salasynda qyzmet etkeni aitylady. Basylym málimetinshe, áriptesteri arasynda Aslan Álserovtiń áieline buǵan deiin birneshe ret qol kótergeni týraly sóz taraǵan. Sondai-aq áieldiń jumysqa denesinde soqqy izderimen kelgen kezderi bolǵany aitylyp otyr. Alaida bul málimetterge qatysty resmi organdar ázirge naqty túsinikteme bergen joq.
Sol túni úidegi aiqaidan keiin áieldiń 15 jastaǵy eki uly men olardyń 14 jastaǵy dosy oqiǵa ornyna kelgeni habarlandy. Tergeýdiń aldyn ala nusqasy boiynsha, jasóspirimderdiń biri er adamnyń basynan qatty zatpen urǵan bolýy múmkin. Qazir tergeý onyń naqty qandai zatpen soqqy alǵanyn anyqtap jatyr.
Kei derekke súiensek, es-tússiz jatqan er adamnyń qol-aiaǵy kiimmen bailanǵan bolýy yqtimal. Keiin kúdiktiler onyń denesin kópqabatty úidiń janyndaǵy kólikke aparǵan degen boljam bar. Máiit kórpege nemese jaimaǵa oralǵan bolýy múmkin.
Tańǵa jýyq kólik Almaty oblysynyń Kegen aýdany baǵytyndaǵy aýyldardyń birinen ótken. Keiin Kókpek – Kóktal – Kegen tas jolynan taýǵa qarai shamamen jarty shaqyrym júrgen soń, marqumnyń denesi sol mańda órtelgeni aitylady.
Politseidiń súiegin taýǵa joǵalǵan malyn izdep shyqqan jergilikti shopan taýyp, quqyq qorǵaý organdaryna habarlaǵan.
Qazir tergeý qylmystyń barlyq mán-jaiyn anyqtaý úshin birqatar sot-meditsinalyq saraptama taǵaiyndamaq. Sonymen qatar erli-zaiyptylardyń uialy telefondary da tekseriledi.
Aldyn ala málimet boiynsha, Arailym Álserova, onyń eki uly jáne 14 jastaǵy jasóspirim ustalǵan. Olardyń kinásin moiyndaǵany aitylǵanymen, bul jóninde resmi aqparat áli jariialanǵan joq. Kúdiktilerdiń kinási sotta dáleldenbeiinshe, olar kinásiz dep sanalady.
Aslan Álserov politsiia qyzmetine shamamen 10 jyl buryn kelgen. Ol buǵan deiin arnaiy jedel áreket etý bóliminde qyzmet atqaryp, byltyr tamyz aiynda Almaty qalasy Áýezov aýdany qylmystyq politsiia bóliminiń aǵa detektivi bolyp taǵaiyndalǵan.
