Oraldyq ánshi Erjan Maksim reseilik «Golos. Deti» konkýrsynyń finalyna joldama aldy, dep habarlaidy "Ult aqparat".
Erjannyń anasy Gúlmira Álibektiń aitýynsha, Valerii Meladzeniń komandasynda bolǵan 11 jasar uly «Jekpe-jekter» kezeńinen súrinbei ótti.
Onda jas daryn ózimen birge konkýrsta baq synap jatqan Ivan Starikov jáne Islam Balkoevpen Mýslim Magomaevtyń «Siniaia vechnost» ánin oryndady. Tálimgeri V.Meladze osy úsheýiniń ishinen Erjandy tańdady.
Baǵdarlama sońynda qatysýshylar taǵy da irikteldi. Sonyń nátijesinde eki finalist anyqtaldy. E.Maksimmen birge Mihail Grigorianǵa finalǵa joldama berildi.
Bir qyzyǵy, Erjan án aityp jatqan kezde staqan jarylyp ketken. Videonyń astyna pikir jazyp jatqandardyń biri ánshiniń zor daýsy men energetikasynan shyny shatyrlap syndy dese, endi biri munyń telearnadaǵy arnaiy effekt ekenin aitady.
Munyń aldyndaǵy synda Erjan Andrea Bochellidiń «Ama credi e vai» ánin oryndap, tamasha daýysymen qazylar alqasyn tańǵaldyrǵan bolatyn. Qazylar Svetlana Loboda, Pelageia jáne Valerii Meladze úsheýi birdei burylyp, qazaqstandyq jas oryndaýshyny ózine baýlýǵa alýǵa yqylas bildirdi. Erjan solardyń ishinen ataqty ánshi Valerii Meladzeni tańdaǵan edi.
«Jekpe-jekter» kezeńi 2 naýryzda ótti. Tek baiqaýdyń erejesi boiynsha nátijesin eshkimge aitýǵa bolmaityn edi. Sondyqtan qorytyndysy keiin belgili bolyp jatyr. Endi 19 sáýirde qosymsha kezeń, 26 sáýirde final jáne sýperfinal bolady. Erjannyń Oraldaǵy ustazy - belgili ánshi Dariia Baqytova. Aqtaýdaǵy vokalist ustazy - Nurgúl Mederbekova. Qazir Aqtaý qalasynda daiyndalyp jatyrmyz», dedi QazAqparat tilshisine G.Álibek.
Erjan Maksim - jastyǵyna qaramastan, respýblikalyq, halyqaralyq dodalarǵa qatysyp, top jaryp úlgergen talant.
Eske sala keteiik, budan buryn E.Maksimniń Rigada ótken festivalda úsh márte júldeger atanǵanyn, Italiianyń San-Remo qalasynda birinshi oryndy ielengenin jazǵan bolatynbyz.
Ókinishke qarai, taǵy bir qazaqstandyq 9 jastaǵy Jan Makim baiqaýdyń kelesi kezeńine óte almady.
