Oralda áielin óltirdi degen kúdikpen ustalǵan sheneýnikke qatysty jańa derekter belgili boldy. Bul týraly "Astana" telearnasynyń siýjetinde aityldy, - dep habarlaidy Tengrinews.kz.
Eske salaiyq, qaiǵyly oqiǵa biyl sáýirde boldy. Tergeý málimetterine sáikes, TÚKSh bóliminiń burynǵy qyzmetkeri kóshede áielin pyshaqtap óltirgen. Oǵan 20 ret pyshaq suqqan. Qaza tapqan áiel balalarymen úiden ketip qalǵan. Ol týystaryna kúieýi únemi uryp-soǵatynyn aitqan eken.
Marqumnyń anasy Kákima Qajipanova qyzyn pyshaqtap óltirgen qylmysker jazadan qutylyp kete me dep alańdaidy. Óitkeni tergeý amaldary tórt ai ótse de, áli aiaqtalmaǵan. Ári "burynǵy kúieý balanyń qyzyma kórsetpegen qorlyǵy joq, áielin uryp-soǵýdy ádetke ainaldyrǵan jigittiń ony óltirýge daiyndalǵany anyq", deidi.
"Úige kelgennen keiin qyzym aitty: "Biz ekeýmiz eki túrli adambyz, anashym. Otyrǵyzyp qoiyp maǵan qol jumsaidy, túnimen uiyqtatpaǵan kúnderi boldy. Aiaq jaqqa otyrǵyzyp qoiyp, uiyqtap bara jatsam aiaǵymen túrtip oiatady", - dedi. Jumystan sál keshigip qalsam, avtobýspen keledi ǵoi. Keide dúkenge soǵady. Sondaida esikti kilttep qoiady deidi. Sonda talai jańbyrda, jelde, boranda syrtta júrgen shyǵar, sonyń birin de aitqan joq qoi. Kelisetin shyǵarmyz dep oilaǵan siiaqty", - deidi Kákima Qajipanova.
Al politsiia departamentiniń dereginshe, adam óltirdi degen kúdikpen Oral qalalyq ákimdiginiń burynǵy qyzmetkerine qatysty qylmystyq is qozǵalǵan. Biraq tergeý barysynda keibir máselelerdi naqtylaý úshin arnaiy saraptama taǵaiyndalyp, kúdikti Almaty qalasyna jiberilgen.
"Saraptamanyń qorytyndysyna sáikes, bul jerde tergeýdiń qoiǵan suraqtaryna jaýap alý múmkin bolmady. Sondyqtan statsionarlyq rejimde psihologiialyq-psihiatriialyq saraptama júrgizýge sheshim qabyldandy. Ol Almaty qalasynda júrgiziledi. Endigi saraptamanyń nátijesin kútemiz", - dedi BQO PD baspasóz qyzmetiniń jetekshi mamany Móldir Sadyrǵalieva.
Kúdiktiniń qorǵaýshysynyń aitýynsha, ol burynǵy áieliniń jumysyna baryp, balalarynyń bolashaǵyn aqyldasqysy kelgen, ony óltirý oiynda bolmaǵan.
"Pyshaǵy qaltada júretin sývenirlik pyshaq. Mine, sot-dárigerlik saraptamasy boiynsha 4 ret keýdesinen pyshaq salǵan. Al basqa 13-iniń bári, jeńil jaraqat! Qazir men sizge Joǵary sottyń qaýlysyn kórsetemin. Búkil jaraqat 30 sekýndta salynǵan. Al endi anadai qatygezdikpen jasaý úshin oǵan endi ýaqyt kerek", - dedi kúdiktiniń qorǵaýshysy Ǵinaiat Salyqova.
Sarapshylar qylmystyń qandai jaǵdaida jasalǵanyn anyqtap jatyr. Iaǵni kúdiktige qandai bappen aiyp taǵylatyny naqtylanady.
