QR Premer-Ministri Asqar Mamin Batys Qazaqstan oblysyna jumys sapary barysynda Indýstriialyq-innovatsiialyq damý memlekettik baǵdarlamasy aiasynda ashylǵan Oral transformator zaýytyna bardy, dep habarlaidy QR Úkimetiniń baspasóz qyzmeti.
Oral transformator zaýytynyń basqarýshy direktory Aqjol Saýranbaev habarlaǵandai, zaýytta úsh aýysymda 300-den astam adam jumys isteidi. Biyl 9 myń transformator shyǵarý josparlanǵan, bul óndiris ósiminiń 35%-yn quraidy. Kelesi jyly jobalyq qýatyna shyǵyp, óndiris kólemin jylyna 12 myń transformatorǵa deiin arttyrý kózdelgen.
«Eksport kólemi 95%-dy quraidy. TMD elderine: Resei Federatsiiasyna, Grýziiaǵa, Ázerbaijanǵa jáne Armeniiaǵa eksporttaimyz», - dedi A. Saýranbaev.
Kelesi jyly paneldi radiatorlardyń jańa óndirisin iske qosý josparlanǵan. Josparlanyp otyrǵan óndiristik qýat – jylyna 3000 tonna radiator. Ónimderdiń 30% ishki naryqqa jiberiledi, al 70% – eksporttalady. Kásiporynda qosymsha 100-den asa jańa jumys orny qurylady.
«Aldaǵy 2 jylda jańa ónim túrlerin shyǵarý arqyly óndiristi keńeitýdi josparlap otyrmyz. Bul – transformator quraýǵa qajetti bólshekter men materialdar, paneldi radiatorlar, izoliatsiialyq qaǵazdar jáne t.b.», - dedi kásiporyn direktory.
Onyń aitýynsha, jobanyń ereksheligi mynada - bul ónim túrleri 70% eksportqa baǵdarlanǵan jáne EAEO elderiniń aýmaǵynda shyǵarylmaidy. Shyǵarylatyn ónimniń negizgi tutynýshylary Resei men Belarýstiń transformator zaýyttary bolmaq.
