Elimizdiń ontústiginde qýaty 2150 MVt bolatyn bý-gaz qondyrǵylaryn salý máselesi pysyqtalyp jatyr. QR Energetika Maǵzum Myrzaǵaliev Úkimet otyrysynda osyndai málimet aitty, dep habarlaidy QazAqparat.
«Ekologiialyq jaǵdaidy jaqsartýdaǵy taǵy bir mańyzdy másele jumys istep turǵan jylý elektr ortalyqtaryn gazǵa kóshirý bolyp tabylady. Sondai-aq, taza generatsiialaý kózderin paidalana otyryp, jańa stantsiialardy salý qajet. 2022 jyly Nur-Sultan qalasynyń birinshi jáne ekinshi Jylý elektr ortalyqtaryn gazǵa aýystyrý jobalary aiaqtalady.
Al Almaty qalasyndaǵy 3 jylý elektr ortalyǵyn gazǵa aýystyrý boiynsha jumystar júrip jatyr. Bul ortalyqtardyń jalpy qýaty 1300 MVt bolady. Jobany aiaqtaý merzimi – 2026 jylǵa deiin», -dedi vedomstvo basshysy.
Sondai-aq, ol elimizdiń ontústiginde qýaty 2150 MVt bolatyn bý-gaz qondyrǵylaryn salý máselesi pysyqtalyp jatqanyn atady. Bul joba Túrkistan oblysy men qalasyn, Taldyqorǵan, Qyzylorda qalalarynyń ekologiiasyn jaqsartady degen esep bar.
«Sonymen qatar, Qaraǵandy oblysynyń Temirtaý qalasynda ArcelorMittal Temirtau stantsiialaryn gazǵa aýystyrý boiynsha jumystar júrip jatyr. Orta merzimdi perspektivada elimizdegi taý-ken salasyndaǵy iri kásiporyndardy kómirden gazǵa kóshirý josparlanǵan», -dedi ministr.
