Ońtústik Koreianyń ońtústigindegi Kvańdjý qalasynda qulaǵan bes qabatty ǵimarattyń jolaýshylar avtobýsyn basyp qalýy saldarynan kem degende toǵyz adam kóz jumdy, segiz adam jaraqattandy, dep habarlaidy BBC agenttigi.
Ulttyq órtten saqtaý qyzmetiniń dereginshe, ishinde 17 jolaýshysy bar avtobýs buzýǵa uiǵarylǵan ǵimarattyń tap qasyna toqtaǵan kezde ol qulaǵan.
Qazir qaiǵyly oqiǵa ornynda órt sóndirýshiler úiindilerdiń astynda aman qalýy múmkin adamdardy qutqarý jumystaryn júrgizýde. Ǵimarattyń qulaý sebepteri týraly áli aitylmady.
Órt sóndirý qyzmeti ókiliniń sózinshe, onda bolǵan barlyq jumysshylar aldyn ala evakýatsiialanǵan.
Qulaǵan ǵimaratqa qarama-qarsy ornalasqan dúken iesiniń aitýynsha, bul oqiǵa jer silkinisine uqsaǵan.
«Men joldy kóre almai qaldym – bárin tuman basyp qalǵandai boldy, - dedi ol jýrnalisterge. – Keiin men syrtqy kameralardyń jazbasynan ǵimarattyń avtobýsqa qulaǵanyn kórdim».
