Qazaqstan Musylmandary dini basqarmasynyń tóraǵasy, Bas múfti Naýryzbai qajy Taǵanuly qashyqtan qurban shalý júiesiniń jumysyn túsindirdi, dep habarlaidy QazAqparat.
«Qurban shalý – jaǵdaiy kelgen musylmanǵa ýájip bolyp esepteledi. Osynaý ultyq ǵibadatty oryndaý maqsatynda Dini basqarma el musylmandarynyń ótinishin eskere otyryp, biyl alǵash ret Qurban ait qarsańynda halyqaralyq tájiribelerge súienip, qashyqtan qurban shalý jobasyn qolǵa aldyq. Osy maqsatta https://qurban2020.kz saity ashylyp, búginnen bastap, 24 saǵat boiy iske qosylady. 30 shildege deiin qurban shalýǵa onlain tapsyrys qabyldanady», - dedi Bas múfti Ortalyq kommýnikatsiialar qyzmetinde.
Spikerdiń aitýynsha, onlain rejimde tapsyrys qabyldap, qurbandyq etin muqtaj jandarǵa taratý tájiribesi Túrkiia, Malaiziia, Indoneziia, BAÁ syndy birqatar musylman memleketterde burynnan qalyptasqan jáne dástúrge ainalǵan.
«Bul júieniń basty ereksheligi – qurbandyq eti túgeldei muqtaj jandarǵa taratylady. Alǵash ret iske qosylǵaly turǵan bul júieniń kemshilikteri bolýy múmkin. Tehnikalyq qiyndyqtar týyndasa, túsinistikpen qaraýdy ótinemiz. Onlain qurbandyq júiesin ashýdaǵy maqsat – syn-saǵatta paida tabý emes, halyqtyń qurban shalýǵa degen qajettiligin júzege asyrý. Dini basqarmanyń maqsaty – azamattardyń qurbandyǵyn shalýdy uiymdastyrý. Onlain tapsyrys arqyly qurbandyq shalý kezinde daǵdyǵa ainalǵan maldy tańdaý, qasapshy janyna baryp qatysý múmkindigi bolmaiyn dep tur. Bul jobany karantin kezinde qurban shalýǵa niet etken azamattardyń nietin júzege asyrý múmkindigi retinde usynyp otyrmyz. Alla qalasa, atalmysh joba kelesi jyly óz jalǵasyn tabady dep úmittenemiz. Onlain qurbandyq shalýda imamdarymyz deldaldyq qyzmet jasamaidy. Eki ortada júrip paida tabýmen ainalyspaidy. Bizdiń mindet – halyqqa qyzmet, qurbandyq shalýdy uiymdastyrý men qurban etterin muqtaj jandarǵa úlestirip berý ǵana», - dedi Naýryzbai qajy Taǵanuly.
Osy kezge deiin azamattar qurban etin úshke bólip, bir bóligine aǵaiyn-týys, kórshi-qolańǵa aittyq dastarhan jaiatyn. Pandemiia jaǵdaiyna bailanysty biylǵy onlain qurbandyq shalynǵanda ettiń úshten biri berilmei, túgeldei muqtaj jandarǵa úlestiriletin bolady.
