Óndiristik qaýipsizdikke jaýapty basshylar mekemede qaýipsizdik tártibin saqtamaǵan adamdardy jumystan shettetip, qajet bolsa, tutas óndiristi toqtatýǵa quqyly. Bul týraly QR Tótenshe jaǵdailar ministrligi Ónerkásiptik qaýipsizdik komitetiniń tóraǵasy Nyǵmetjan Maqajanov aitty, dep habarlaidy QazAqparat.
Ortalyq kommýnikatsiialar qyzmetinde ótken brifingide Nyǵmetjan Maqajanov óndiristik qaýipsizdik salasyndaǵy zańnamalyq ózgerister týraly málimet berdi.
«Biyl sáýirde Memleket basshysy aǵymdaǵy «Ónerkásiptik qaýipsizdik máseleleri boiynsha ózgerister men tolyqtyrýlar engizý týraly» Qazaqstan Respýblikasynyń Zańyna qol qoiǵanyn atap ótken jón. Jalpy qabyldanǵan jańashyldyqtar zańnama normalaryn jetildirýge, qaýipti obektilerdegi memlekettik qadaǵalaýdyń tiimdiligin arttyrýǵa, ónerkásiptik qaýipsizdik salasynda jumystar júrgizý quqyǵyna attestattalǵan jáne avariialyq-qutqarý jumystaryn júrgize alatyn uiymdardyń qyzmetin retteýge baǵyttalǵan», - dedi komitet basshysy
Onyń aitýynsha, zańnamalyq ózgeristerdiń nátijesinde óndiristik baqylaý qyzmetteriniń laýazymdy tulǵalarynyń mártebesi kúsheitilgen
«Atap aitqanda, jumyskerlerdiń ómiri men densaýlyǵyna qater tónetin jaǵdai baiqalsa, óndiristik baqylaý qyzmetteriniń laýazymdy tulǵalary jumysty ýaqytsha toqtatyp, tekserý uiymdastyrýǵa jáne qaýipsizdik talaptaryna sáikes kelmeitin adamdardy jumystan shettetýge quqyly. Bul jańalyqtar kásiporynǵa óz qyzmetinde ónerkásiptik qaýipsizdik talaptarynyń buzylýyn óz betinshe anyqtaýǵa múmkindik beredi. Bir jaǵynan jumys berýshi yqtimal olqylyqtyń aldyn alýǵa múddeli bolady. Óitkeni kásiporynnyń jumysynda órekel olqylyq tabylmasa, bir jylǵa tekserýden bosatylýy múmkin. Osylaisha kásiporyn basshylary men quryltaishylaryn yntalandyrý sharasy engizilip otyr», - dedi Nyǵmetjan Maqajanov.
