Aqtóbe oblysynyń ákimi Ońdasyn Orazalin «CNPC-Aqtóbemunaigaz» kompaniiasyndaǵy ailyq teńsizdigi týraly pikir bildirdi, dep habarlaidy QazAqparat.
«Birinshiden, men kez kelgen kásiporyndaǵy ereýilderdi jumysshy taptyń óz quqyǵyn qorǵaý kúresi dep qaraimyn. Bul – bárimiz mektep qabyrǵasynan beri biletin aksioma shyǵar. Osylai qarasaq, men bul jaǵdaidan sonshalyq tragediia kórip turǵan joqpyn. Qandai da bir kásiporynnyń jumysshylary eńbek jaǵdaiyna, eńbekaqy deńgeiine kóńili tolmasa, óz máselelerin sheshýge quqyly. Kásipodaqtardyń kelissózderi bar. Eger másele onymen sheshilmese, ereýilge shyǵa alady», - dep bastaǵan ákim halyqaralyq tájiribede bul másele jumysshy men jumys berýshi arasynda jeke sheshiletinin atady.
«Mysaly, Tehastyń nemese tipti Resei oblystarynyń gýbernatory osyndai máseleni sheshýmen anilasyp júrgenin elestete almaimyn. Ókinishke qarai, bizde «bárine ákim jaýapty» degen praktika qalyptasqan. Árine, bul máselede men ózime jaýapkershilik aldym. Qazir máseleni sheshý úshin qolymnan kelgenniń bárin jasap jatyrmyn. Eńbek inspektsiiasy, kásipodaq uiymdary, jumys berýshiler bar. Solardyń arasynda dialog ornatýǵa kúsh salyp jatyrmyz. Aqtóbe oblysynda jalpy eńbekaqy deńgeii, óńirdiń áleýetine qaramastan, ortasha respýblikalyq deńgeiden tómen. Ortasha respýblikalyq kórsetkish 260-270 myń teńge bolsa, bizde 225 myń teńgege áreń jetedi, - deidi oblys basshysy.
Onyń málimeti boiynsha, aqtóbelik munaishylardyń ailyǵy Mańǵystaý, Atyraý oblystaryndaǵy áriptesterine qaraǵanda 2-3 ese tómen kórinedi.
«Bir jaǵynan bul tarihi jaǵdaiǵa bailanysty osylai qalyptasqan. Munai kompaniialarynyń aldyna eńbekaqyny kóterý týraly talap qoiyp otyrmyz. Naqty «CNPC-Aqtóbemunaigaz» kompaniiasy boiynsha aitsaq, qazir oblystyń jer qoinaýyn ári qarai paidalaný týraly kelisimshart qaita jazylyp jatyr. Osy qujattaǵy negizgi sharttardyń biri – eńbekaqy kólemin ortasha salalyq normamen teńestirý. Budan bóleý áleýmettik sipattaǵy basqa da sharttar bar», - degen Ońdasyn Orazalin CNPC –diń jeke ózinde de, merdiger uiymdarynda da ailyq boiynsha aiyrmashylyq bar ekenin rastady.
«Bul jerde másele munaiǵa servistik qyzmet kórsetetin kompaniialar men CNPC-Aqtóbemunaigaz arasyndaǵy kelisimderge bailanysty bolyp tur. Biz bul iste tarifti kóterýdi talap etý arqyly ǵana ailyqqa áser ete alamyz. «CNPC- Aqtóbemunaigazdyń» ózinde ortasha jalaqy boiynsha aiyrmashylyq óte joǵary. Tómengi satydaǵy personal shamamen 200 myń teńge alsa, basqarýshy quramnyń ailyǵy 700 myń teńge kóleminde. Sonda ortasha jalaqy 300 myńnyń ainalasynda. Al qosalqy merdiger kompaniialarda ailyq múlde az. Men 90-120 myń teńge ǵana alatyn qosalqy merdigerler bar ekenin estigende tipti tańǵalǵam», - dedi oblys ákimi.
