Túrkistan oblysynyń ákimi Ómirzaq Shókeev halyqpen tyǵyz bailanys ornatý úshin Facebook áleýmettik jelicinde jeke paraqshasyn ashty. Osylaisha aimaq basshysy turǵyndardy tolǵandyrǵan máselelermen tanysyp, olardyń oń sheshilýine yqpal jasamaq, dep habarlaidy "Ult aqparat".
«Qurmetti otandastar! Qazirgi tańda áleýmettik jeliler kóptegen qyzmet salalarynda mańyzǵa ie jáne qoǵammen bailanys úshin eń tanymal platforma bolyp qala beredi. Áleýmettik jelilerdi paidalaný - ýaqyt talaby. Soǵan sáikes, endi Facebook áleýmettik jelisinde óz paraqshamdy ashyp otyrmyn. Bul paraqsha arqyly aimaqtaǵy jańalyqtardy jáne ózgeristerdi habarlaityn bolamyn. Sonymen qatar, maǵan Sizderdiń pikirlerińizdi bilý jáne usynystaryńyzdy qarap, jaýap berý mańyzdy. Endi #Shokeevke_suraq heshtegi arqyly óz pikirlerińizdi, tilekterińizdi qaldyra alasyzdar» delingen paraqshada.
Óńir basshysy jeke paraqshasynda sondai-aq, jańadan oblys ortalyǵy bolǵan Túrkistan qalasynyń damýy men oblys aýmaǵynda atqarylyp jumystardy jazyp kórsetken. Aldaǵy josparlarymen bólisken.
«QR Tuńǵysh Prezidenti Nursultan Ábishuly Nazarbaevtyń tarihi sheshimi - oblys jáne túrki áleminiń mádeni-rýhani ortalyǵy retinde Túrkistannyń áleýmettik-ekonomikalyq damýyna qýatty serpin berdi. Bul tarihi qadam rýhani astananyń jańa múmkindikterin ashty. Búgingi kúni qasietti qalada aýqymdy ózgerister bolyp jatyr, jańa qala salynýda. Bul baǵyttaǵy jumystar qyzý túrde jalǵasady. Meniń aldymda úlken mindetter tur. Basty maqsat - oblys halqynyń ál-aýqaty men ómir súrý sapasyn jaqsartý. Osy aptada men Keles jáne Saryaǵash aýdandaryna baryp, sharýa qojalyqtary men kásiporyndardyń jumysymen tanystym. Jerlesterimniń eńbekqorlyǵy men oblystyń áleýeti zor ekenin atap aitqym keledi. Mundai saparlar aldaǵy ýaqytta da jalǵasatyn bolady»,- deidi Ómirzaq Shókeev.
