Foto: primeminister.kz
Qazaqstan Respýblikasy Prezidentiniń tapsyrmasy boiynsha Premer-ministr Oljas Bektenov Niý-Delige jumys sapary aiasynda Úndistan Respýblikasynyń Premer-ministri Narendra Modimen ekijaqty kezdesý ótkizip, India AI Impact Summit 2026 halyqaralyq sammitine qatysty, dep habarlaidy Ult.kz.
Oljas Bektenov Úndistan Premer-ministrine Qazaqstan Prezidentiniń atynan jyly lebizderin jetkizdi. Óz kezeginde Narendra Modi Qasym-Jomart Toqaevqa izgi tilekterin joldady jáne strategiialyq áriptestikti jańa deńgeige shyǵarý boiynsha birlesken jumysty jalǵastyrý nietin bildirdi.
2025 jyldyń qorytyndysy boiynsha eki el arasyndaǵy taýar ainalymy $923,3 mln-dy qurady. Saýda jáne investitsiialar, energetika, AÓK, tsifrlandyrý jáne JI salasyndaǵy yntymaqtastyqty odan ári damytý máseleleri talqylandy. Qazaqstan Úndistan naryǵyna 40 taýarlyq pozitsiia boiynsha $150 mln-ǵa ónim jetkizý kólemin ulǵaitýǵa daiyn. Mańyzdy mineraldar men sirek jer elementteri, ǵarysh, qorǵanys ónerkásibi salalaryndaǵy ózara is-qimyldy keńeitýdiń eleýli áleýeti atap ótildi.
Premer-ministr álemniń 50-den astam elinen, sonyń ishinde memleket jáne úkimet basshylary, sondai-aq IT salasyndaǵy sarapshylar men ǵylymi qaýymdastyq ókilderi jinalǵan India AI Impact Summit 2026 sammitine qatysty.
Oljas Bektenov plenarlyq sessiiada sóilegen sózinde ozyq tehnologiialardyń ekonomikalyq áleýetine jáne olardyń jahandyq ósý qurylymyndaǵy áserine nazar aýdardy.
«Biz intellektiniń inkliýzivti, derbes jáne eń bastysy ekonomikanyń negizgi sektorlaryn transformatsiialaityn kúshke ie bolýy kerek ekenine senimdimiz. Búginde Qazaqstan óńirlik tsifrlyq ortalyqqa ainalýda. Sondai-aq BUU-nyń Elektrondyq úkimetti damytý indeksinde 193 eldiń ishinde 24-shi orynda turmyz. Elimiz, sonymen qatar onlain-qyzmetterdiń sapasy boiynsha álemdegi eń úzdik ondyqqa kiredi. Prezident Qasym-Jomart Toqaev úsh jyl ishinde Qazaqstandy tolyq tsifrlyq elge ainaldyrý maqsatyn qoidy. Jasandy intellekt bizdiń ulttyq damýymyzdyń strategiialyq tiregi bolyp sanalady», — dep atap ótti Oljas Bektenov.
Qazaqstan Premer-ministri álemdik tehnologiialyq kompaniialardy ozyq tehnologiialardy damytý salasyndaǵy yntymaqtastyqqa shaqyrdy.
Memleket basshysy jariialaǵan Tsifrlandyrý jáne JI jyly aiasynda Qazaqstanda tsifrlyq ekonomikany damytý boiynsha jumystar júrgizilýde. Innovatsiiany retteý men yntalandyrý arasyndaǵy tepe-teńdikti qamtamasyz etetin «Jasandy intellekt týraly» zań qabyldandy. Prezident janynan qurylǵan JI-di damytý jónindegi keńes bir platformada jetekshi álemdik vizionerlerdi biriktirdi. Ortalyq Aziiada alǵash ret eki iri sýperkompiýter klasteri ornalastyryldy, NVIDIA-men seriktestikte Derbes JI habyn qurý jobasy júzege asyrylýda. Biyl ázerbaijandyq seriktestermen birlesip, Transkaspii talshyqty-optikalyq jelisiniń qurylysyn aiaqtaý jahandyq derekter trafigi úshin eń qysqa balama marshrýtty qamtamasyz etedi, bul Qazaqstanǵa Shyǵys pen Batys arasyndaǵy tsifrlyq kópir bolýǵa jol ashady. Ekibastuz qalasynda júzege asyrylyp jatqan flagmandyq «DÓO-lar alqaby» jobasy da iri derekter ortalyqtary úshin ekojúie qalyptastyrýǵa múmkindik beredi. Memleket infraqurylym, jobalardy súiemeldeý jáne taǵy da basqa qajetti qoldaýdyń barlyq túrin usynatyny atap ótildi.
Forým qorytyndysy boiynsha delegatsiia basshylary India AI Impact Expo 2026 halyqaralyq kórmesine bardy, onda jasandy intellekt salasyndaǵy praktikalyq sheshimder, tehnologiialar jáne qoldanbaly ázirlemeler usynyldy. Ekspozitsiia ónerkásip, qarjy, densaýlyq saqtaý, qaýipsizdik jáne taǵy da basqa salalardyń keń aýqymyn qamtydy.
