Halyqaralyq Olimpiada komitetiniń prezidenti Tomas Bah Ulttyq Olimpiada komitetteriniń basshylarymen keńeitilgen telekonferentsiia ótkizdi, dep habarlaidy Olympic.kz.
Qazaqstan Ulttyq Olimpiada komitetiniń basshylyǵy da onlain kezdesýge qatysty. Kún tártibinde óte mańyzdy máseleler qaraldy.
Eki saǵattan asa ýaqyt boiy qatysýshylar ǵalamdyq pandemiia, sportshylardy vaktsinalaý, BUU rezoliýtsiiasy men aldaǵy Tokio-2020 jáne Beijiń-2022 Olimpiadalaryna daiyndyqty talqylady.
Jiyn barysynda sóz alǵan Tomas Bah 2021 jyldyń qarbalasqa toly bolatynyn atap ótti. Óitkeni, Tokiodaǵy Olimp oiyndarynan keiin 6 ai ótken soń qysqy Olimpiada bastalady.
Mundai jait tarihta alǵash ret oryn almaq. Qazirgi sátte HOK eki iri sport sharasyna tolyqqandy daiyndyq júrgizýde.
Tomas Bah 2020 jylǵy Tokio Olimpiadasy qarsańyndaǵy túrli sybystar men qaýesetterge toitarys berý úshin Olimpiada qozǵalysynyń birlesip jumys isteýi qajettigine erekshe toqtalyp ótti.
«Qazir Olimpiada qozǵalysynyń bar nazary 2020 jylǵy Tokio oiyndaryna baǵyttalǵan. 21 qańtardyń keshi men 22 qańtar kúngi jańalyqtarda Japoniianyń Olimpiadany ótkizýden bas tartatyny týraly arandatýshylyq baǵyttaǵy jazbalar kóp boldy. Biraq bul jalǵan aqparat. Men barshańyzdy tek qana resmi derekkózder men HOK-tyń resmi málimdemesine senýge shaqyramyn. 22 qańtar kúni Japoniia biligimen telefon arqyly sóilestim, olar Japoniia biligi atynan resmi málimdeme múlde bolmaǵanyn aitty. Taǵy da qaitalap aitamyn, Olimpiada oiyndary men barlyq jarystar jáne is-sharalar josparlanǵan ýaqytynda ótedi. Osy salaǵa qyzyǵýshylyq tanytqan taraptardyń bári de Oiyndy sátti ótkizý úshin tynymsyz eńbektenýde. Sondyqtan, «B» josparyn oilastyrýǵa negiz joq. Japoniia naqty qadamdar arqyly bul oiyndy ótkizýge daiyn ekenin barshamyzǵa kórsetti. Sondai-aq, eldegi saiasi pikirtalastarǵa qaramastan, Qytai da qysqy oiyndardy ótkizýge ázir», - dedi HOK prezidenti.
HOK basshysy Olimpiada oiyndaryna qatysýshylardy vaktsinatsiialaý týraly da aitty.
Tomas Bah osy suraqqa qatysty Ulttyq Olimpiada komitetterine kómektesýge ýáde berip, barlyq sportshylardy vaktsina qabyldaýǵa shaqyrdy.
Alaida, vaktsinatsiialaý ár sportshynyń erki boiynsha júrgiziledi. Búkilálemdik densaýlyq saqtaý uiymy Japoniia jáne HOK-pen birlese otyryp koronavirýsqa qarsy sharalar tizbegin jetildirýde.
Osy oraida, sportshylardyń kelýi, olardyń qozǵalysy, testileýdi uiymdastyrý jáne jarysqa qatysýǵa deiingi barlyq aspektiler esepke alynǵan.
Japoniia biligi jarys kezinde kórermender men jankúierlerdi tribýnaǵa kirgizý máselesin muqiiat zertteýde.
Tomas Bah barlyq saýaldar men maman keńesterin talqylaǵan soń, HOK óz usynysyn jetkizetinin málimdedi.
«Japoniia Olimpiada oiyndaryn asyǵa kútýde. Olimpiadanyń bastalýyna bar bolǵany alty ai qaldy. Daiyndyq qarqyndy júrip jatyr, ár minýt saiyn ilgerileý baiqalady. Japoniia biliginiń oiynnan bas tartatyny týraly jaqynda shyqqan jańalyq - jalǵan aqparat. Biz kún saiyn túrli halyqaralyq jáne jergilikti uiymdar men sportshylardan qoldaý hatyn alamyz. Bizge mundai qoldaý asa qajet. Bizge árqaisyńyzdyń qoldaýyńyz kerek. Osydan-aq oiynnyń qundylyǵy arta túsedi. Bárimizdiń maqsatymyz ortaq», - dedi Japoniia Ulttyq Olimpiada komitetiniń prezidenti Iasýhiro Iamashita.
HOK basshysy naýryz aiynda ótetin HOK-tyń 137-shi Sessiiasy 2020 jylǵy Olimp oiyndaryna daiyndyqtyń aiaqtalýy men kovid kezeńindegi Olimpiadalyq qozǵalystyń bolashaǵyna baǵyttalatynyn aitty.
Sessiia aiaqtalǵan soń Ulttyq Olimpiada komitetterimen taǵy bir kezdesý ótkizý josparlanǵan.
Qazaqstan Ulttyq Olimpiada komiteti sportshylardyń densaýlyǵy men qaýipsizdigine qashanda basymdyq beredi.
Qazirgi sátte komitet Qazaqstan ulttyq federatsiialarymen birlese otyryp, aldaǵy Olimpiada oiyndaryna daiyndyqty jalǵastyrýda.
