Bokstan ulttyq quramanyń bas bapkeri Ǵalymbek Kenjebaev 28 aqpan kúni Iordaniiada ótetin Aziia jáne Muhit elderi úshin litsenziialyq olimpiada týrnirine attanatyn komanda quramyn jariialady, dep habarlaidy "Ult aqparat" Qazaqstan boks federatsiiasynyń saityna silteme jasap.
Týrnirge qatysatyn Qazaqstan quramasynyń músheleri:
52 kelige deiingi salmaq dárejesinde - 2019 jylǵy álem chempionatynyń qola júldegeri Sáken Bibosynov.
57 kelige deiingi salmaq dárejesinde - birqatar halyqaralyq týrnirlerdiń jeńimpazy Serik Temirjanov.
63 kelige deiingi salmaq dárejesinde – 2019 jylǵy Aziia chempionatynyń kúmis júldegeri Zakir Safiýllin.
69 kelige deiingi salmaq dárejesinde - 2017 jáne 2019 jylǵy Álem chempionatynyń qola júldegeri Abylaihan Júsipov.
75 kelige deiingi salmaqta - 2017 jylǵy Álem chempionatynyń kúmis júldegeri, Aziianyń qola júldegeri Ábilhan Amanqul.
81 kelige deiingi salmaq dárejesinde - 2019 jylǵy álem chempiony Bekzat Nurdáýletov.
91 kelige deiingi salmaqta - Álem jáne Aziia chempionatynyń júldegeri, Rio Olimpiadasynyń kúmis júldegeri Vasilii Levit.
91 keliden astam asa aýyr salmaqta - Álem jáne Aziia chempionatynyń eki dúrkin kúmis júldegeri, qurama kapitany Qamshybek Qońqabaev.
«2020 jylǵy Olimpiada oiyndaryna joldama alatyn jigitterdiń barlyǵy myqty boksshylar», - dep atap ótti bas bapker.
Aita ketsek, Iordaniianyń Amman qalasyndaǵy irikteý týrniri 3-11 naýryz aralyǵynda ótedi. Onda Aziia men muhit elderiniń boksshylary úshin 63 litsenziia sarapqa salynady.
