Qazaqstandyq jeńilatletshi, Olimpiada chempiony Olga Shishigina sporttyq jeke zattaryn elordadaǵy Ulttyq mýzeige tartý etti, dep habarlaidy "Ult aqparat".
Olga Shishiginanyń syiǵa tartqan jeke zattary QR Ulttyq mýzeiiniń «Asyl mura» zalynan oryn aldy. Olardyń qatarynda tanymal sportshynyń 2000 jyly Sidnei jazǵy olimpiadasynan estelik zattary, sondai-aq basqa da halyqaralyq sporttyq jarystarda jeńip alǵan medaldar men nagradalary bar.
«Sporttaǵy jetistikterimniń bir bóligin mýzeige tapsyratyn kez keldi dep oilaimyn. Medaldar men marapattar úide ǵana saqtalyp turmai, mýzeide saqtalǵany jón shyǵar. Sebebi meniń jetistikterim - ol elimniń jetistigi. Osy oraida endigi ýaqytta mýzeige kelýshiler meniń sporttaǵy jeńip alǵan marapattarymdy óz kózderimen kóre alady. Bul zattar meniń ómirimniń bir bóligi desemde bolady. Munda Keńes Odaǵy zamanynan kúni keshege deiingi men qatysqan jarystardan estelikter bar», - dedi Olga Shishigina.
Olimpiada chempiony Ulttyq mýzeige barlyǵy 45 jeke zatyn syiǵa tartty.
«Olga Shishigina biz úshin sporttaǵy jarqyn jeńistiń simvoly. Jerlesimizdiń Sidnei Olimpiadasyndaǵy jeńisi áli kúnge esimizde jáne ol sport tarihynda máńgi qalady. Bul kisi otanymyzdyń patrioty jáne sportpen qatar elimizdiń damýyna da óz úlesin qosyp keledi», - deidi QR Ulttyq mýzeiiniń direktory Arystanbek Muhamediuly.
Aita ketsek, atalǵan is-shara «Ulttyq mýzeige syiǵa tartý» jobasy aiasynda uiymdastyryldy. Ondaǵy maqsat-elimizge jáne álemge tanymal tulǵalarǵa tiesili qundy jáne estelik zattardy saqtap, ony keiingi urpaqqa jetkizý.
