Foto: un.org
Qazaqstanda vaktsinalaýdyń birinshi kezeńinde 100 myńnan astam jasóspirim qyzǵa papilloma virýsyna qarsy ekpe egiledi. Bul týraly Densaýlyq saqtaý ministri Ajar Ǵiniiat málimdedi, dep habarlaidy Sputnik Qazaqstan.
Ministr papilloma virýsyna qarsy vaktsinalaý álemniń 140 elinde júrgiziletinin atap ótti. Bul memleketterde jatyr moiny obyrymen aýyrý kórsetkishi 60%-ke tómendegen.
Qazaqstanda alǵashqy kezeńde júz myńnan asa oqýshy qyz egiledi. Osyǵan bailanysty biyldan bastap halyq arasynda aqparattyq jumys júrgiziledi.
"Barlyq 11 jastaǵy qyzǵa ata-analardyń kelisimimen jáne dárigerdiń tekserisinen keiin vaktsina egiledi. Birinshi kezeńde 100 myńnan astam qyzdy vaktsinalaý josparlanyp otyr", - dedi Ǵiniiat Úkimet kýlýarynda.
Ol papilloma virýsyna qarsy vaktsinalaýdy ministrlik 2012 jyly engizbek bolǵanyn eske saldy. Alaida ol ýaqytta aitarlyqtai tájiribe jáne halyqtyń habary bolmaǵandyqtan, bul shara qoldaý tappaǵan.
"Vaktsinatsiiany der kezinde engizgende onkologiialyq aýrýdyń aldyn alýǵa bolar edi. Biz profilaktikalyq sharalarǵa kóp kóńil bólemiz. Aýyryp em izdegenshe, aýyrmaýdyń jolyn izde degen. Áielder arasyndaǵy qaterli isiktiń aldyn alý tásilderiniń biri – kámeletke tolmaǵan qyzdardy adam papilloma virýsyna qarsy vaktsinalaý", - deidi Ǵiniiat.
Onyń aitýynsha, jyl saiyn Qazaqstanda eki myńǵa jýyq áiel jatyr moiny obyryna shaldyǵady.
